Sizin reklam burada

“Zirə”də Rəşad Sadıqov dönəmi başladı

Baxış Sayı:264


"Məsuliyyətli işin altına girdiyimi anlayıram”
"Zirə" daha üç futbolçusu ilə vidalaşıb. Qəsəbə təmsilçisi qanalı hücumçu Riçard Qadze, bostvanalı yarımmüdafiəçi Mfo Kqasvane və müdafiəçi Bəxtiyar Həsənalızadə ilə yolları ayırdığını açıqlayıb. Buna qədər isə Cavid Hüseynov, Tellur Mütəllimov, Orxan Sadıqlı, Yovan Krneta, Miloş Bakraç, Boyan Zoqoviç, Şafik Tiqruca, Adrian Skarlatake və Nicat Süleymanov klubdan ayrılmışdı.
Dünən həm də Ruslan Qurbanovun karyerasını “Zirə”də davam etdirəcəyi məlum oldu. "Keşlə"dən ayrılan 29 yaşlı hücumameyilli futbolçu ilə “1+1 il” şərtiylə müqavilə bağlanıb.
“Zirə”nin yeni baş məşqçisinin adı da məlum olub. Gözlənildiyi kimi, Rəşad Sadıqov komandanın “sükanı arxasına” keçib. Gənc mütəxəssislə 3 illik müqavilə bağlanıb. PRO kateqoriyasına malik 38 yaşlı Sadıqov ötən ay futbolçu karyerasını bitirib.
“Zirə”nin fəxri prezidenti Orxan Məmmədov təyinatla bağlı açıqlama verib. Klubun sahibi mətbuat xidmətinə açıqlamasında geniş və ətraflı müzakirələrdən sonra razılıq əldə etdiklərini söyləyib: “Onun bizimlə çalışmağa razılıq verməsinə görə çox şadam. Futbolçu karyerasını yeni bitirsə də, baş məşqçi kimi təcrübəsi hamıya məlumdu. “Qarabağ”ın gənclərdən ibarət komandası ilə yanaşı, U-21 millimizdə də qısa müddətdə yaxşı işlər görüb. Onun baş məşqçi kimi klubumuzun inkişafına müsbət təsir edəcəyinə inanıram”.
Rəşad Sadıqov isə klubun mətbuat xidmətinə bunları söyləyib: "Məsuliyyətli işin altına girdiyimi anlayıram. Mənə göstərilən etimada görə "Zirə" rəhbərliyinə təşəkkür edirəm. Əlimdən gələnin ən yaxşısını etməyə çalışacam".
Beləliklə, artıq növbəti mövsüm elitada Qurban Qurbanov – Rəşad Sadıqov rəqabəti yaşanacaq. Heç şübhəsiz, bu məqam ölkə çempionatında mübarizəyə rəng qatacaq, futbolsevərlər “Qarabağ” – “Zirə” duellərini xüsusi həvəslə gözləyəcəklər. Hər ikisinin xarakterinə bələd olan şəxs kimi əminliklə deyirik ki, həyatda yaxından dostluq edən bu adamların yaşıl meydanda bir-birinə güzəşt edəcəyini gözləməyə dəyməz. Uğur olsun!
HƏBİB

Oxşar xəbərlər
SON XƏBƏRLƏR