“Keşlə” ilə oyunu Rəvan Həmzəzadə idarə edəcək
Maqaye Geye, Rerras Faysal, Vaqner da Silva, Aylton Silvadan sonra “Qarabağ” daha bir legioneri ilə vidalaşıb. İki həftə öncə ailə problemlərini əsas gətirib vətəni İspaniyaya yollanan Miçel geri qayıtmayacaq. 2015-ci ildən “Qarabağ”ın şərəfini qoruyan və müqavilə müddəti gələn ilin yayına qədər olan dayaq yarımmüdafiəçisi ailə məsələlərini əsas gətirərək, Azərbaycana dönmək istəməyib. Onun klub rəhbərliyinə müraciətindən sonra 2021-ci ilin yayına qədər nəzərdə tutulan müqavilə qarşılıqlı razılıq əsasında pozulub. İspaniyalı futbolçu Ağdam təmsilçisində ümumilikdə 155 matçda meydanda olub və 25 qol vurub. "Qarabağ" futbolçuya göstərdiyi xidmətlərə görə təşəkkür edib, gələcək karyerasında uğurlar arzulayıb.
Miçelin bu məqamda atdığı addımın səbəbini təxmin etmək çətin deyil. Dünyanı cənginə alan pandemiyanın gələcəkdə nələrə yol açacağı ilə bağlı qeyri-müəyyənlik olduğundan ispan futbolçu xaricdə legioner həyatı yaşamaqdansa, vətənində doğmalarının yanında qalmağı üstün tutur. Görünür, martdan iyula qədər Bakıda “ilişməsi” və yalnız böyük zəhmət sayəsində İspaniyaya yollana bilməsi 35 yaşlı futbolçunun gözünü qorxudub. "Qarabağ" Rəşad Sadıqova da təşəkkür edib. Klub sosial şəbəkə hesabında bu sözləri yazıb: "Yolun açıq olsun, kapitan! Hər zaman birlikdəyik!"
Yeri gəlmişkən, "Qarabağ"la "Keşlə" arasında bu gün keçiriləcək yoxlama oyununun başlama saatı açıqlanıb. Qəbələ şəhər stadionunda keçiriləcək görüş saat 17.30-da start götürəcək. Oyunu Şəkidən olan referi Rəvan Həmzəzadə idarə edəcək. Ona həmşəhərlisi Rəşadət Cəfərov və Oğuzdan Müslüm Mövludov kömək edəcək.
HƏBİB