Ötən həftə yığmanın boş qalan baş məşqçi postuna təyinat gerçəkləşdi. Əsas namizəd olan Canni De Byazi komandanın yeni çalışdırıcısı olacaq. Digər namizəd Arif Əsədov isə baş məşqçinin köməkçisi kimi fəaliyyətini davam etdirəcək. Bundan başqa, De Byazinin daha iki köməkçisinin adına aydınlıq gəldi. Benni Karbone və Klaudio Beluççi millidə italyana kömək edəcək.
Təyinatlarla bağlı təəssüratını öyrənmək üçün Arif Əsədovla əlaqə saxladıq: “De Byazinin baş məşqçi təyin olunacağı gözlənilirdi. Namizədlər arasında mən də var idim, amma daha təcrübəlisi De Byazi idi. Ümid edək ki, hər kəs üçün uğurlu olar. Mən də millidəki işimi davam etdirirəm. Öz adımdan deyim ki, baş məşqçinin uğurlu olacağına inanıram. Onun köməkçiləri də məlumdu. Normaldı, hər bir məşqçi gələndə öz köməkçilərini gətirir. Əl-ələ verib çalışmalıyıq. Əsas odu ki, futbolun başlamasına icazə verilsin. Bütün klublarımız məşqə başlasın, çempiont bərpa olunsun ki, ondan sonra yığma da oyunlara yaxşı hazırlaşa bilsin. Əsas odu ki, futbolçuları izləyə bilək. Oyunlar keçirilsin ki, onların hansı səviyyədə olduğunu görək”.
AYGÜL