Sizin reklam burada

“Universitatya” Sezarın yolunu gözləmir

Baxış Sayı:404


Rəşad Sadıqovun ölkə çempionatının son mövsümünün əsas ulduzu saydığı Sezar Meza Kollinin “Keşlə”yə dönüb-dönməyəcəyi hələ də bilinmir. Vətəni Paraqvayda olduğu deyilən futbolçunun 2018-in avqustunda üçillik müqavilə bağladığı Krayova “Universitatya”sına dönmək istəyi anlaşılandı. Axı “Keşlə” ilə icarə müqaviləsinin müddəti iyulun 22-də bitəcək (“vikipediya”da belə yazılıb) Sezar ilk növbədə məxsus olduğu klubun razılığını almalıdı ki, bu məqamda müəyyən suallar yaranır. Hər şeydən əvvəl “Universitatya”nın ona ehtiyac duyub-duymaması maraq doğurur. Bu komanda hazırda ÇFR ilə amansız çempionluq mübarizəsi aparır. Və belə məqamda baş məşqçi Kristiano Berqodinin “qalib heyəti dəyişməzlər” prinsipinə sadiq qalacağı şübhə doğurmur. Onu da xatırladaq ki, italyan mütəxəssis “Universitatya”nın “sükanı arxasına” mayın 8-də keçib, deməli, Sezarın futbolçu keyfiyyətlərinə də bələd deyil. Bələd olmadığı futbolçuya güvənmək isə ağıllı qərar sayılmaz.
Sezarı Rumıniyaya “çağıran” növbəti səbəb qardaşının varlığı ola bilər. Həqiqətən də böyük qardaş - Derlis “Neftçi” karyerasının ardından ötən ilin iyulundan bu ölkədə, daha doğrusu, aşağı dəstə komandası “Petrolul”da çıxış edir. Sezarın Avroliqada oynayacağı şübhə doğurmayan “Keşlə”ni atıb, “qardaşımla birgə oynayım” inadı ilə Ploeşti klubuna keçəcəyi ən azı qeyri-ciddi görünür. Yuxarıda vurğuladığım kimi, “Petrolul” 2-ci dəstədə oynayır, cari mövsümün sonunda elitaya yüksələcəyi də inandırıcı deyil.
Belə görünür ki, Sezar üçün ən münasib qərar 2013-dən bəri çıxış etdiyi (yalnız 2018/19 mövsümündə “Universitatya”da olub) ölkəmizin yolunu tutmaq olardı. Bu gün o, “Keşlə”nin və Azərbaycan çempionatının liderlərindən biri sayılırsa, Rumıniya, “Universitatya” və konkret Berqodi üçün heç kimdi. Krayova klubu bu gün 1 xal qabaqladığı ÇFR ilə mübarizədən qalib ayrılıb, çempionluğu bayram etsə belə, ÇL-də çıxış edəcək heyətdə Meza Kolliyə yer tapılacağı ən azı şübhə doğurur. Bütün belə vəziyyətlər üçün xarakterik olan bir atalar sözümüz də var: daş düşdüyü yerdə ağır olar! Düzdü, bu atalar sözünün paraqvaylıların 87 faizinin danışdığı quarani dilinə tərcüməsini bilmirəm. Amma əminəm ki, Zaur Axundov istəsə, nəinki quarani dilinə, hətta esperantoya da çevirtdirə bilər. Onun əlində belə işlər xırda-xuruş məsələdi. Axundov yolunu gözləyir, Sezar!
ORXAN

Oxşar xəbərlər
SON XƏBƏRLƏR