Klub Meza Kollinin keçidini həll edə bilməyib
Avroliqa planlarını cızan “Keşlə” hələ ki əsas diqqətini transfer çalışmalarına ayırıb. Bakılılar hazırlıq mərhələsi başlayana kimi heyəti müəyyənləşdirmək niyyətindədi ki, bunun üçün qısa müddətdə gedənlərlə gələnlərin adı müəyyənləşməlidi. Gedənlərin adları ictimaiyyətə təqdim olunub. Slavik Alxasov, Ruslan Qurbanov, Tural Bayramlı, Franko Flores, Lorenso Frutos, Cabir Əmirli, Əfran İsmayılov, Murad Ağayevi bundan sonra qırmızı formada görməyəcəyik.
Maraqlısı gedənlərin sırasına daha bir nəfərin qoşulmaq ehtimalıdı. Söhbət komandanın “döyünən ürəyi”, Zaur Axundovun sevimli futbolçularından sayılan Sezar Meza Kollinin “Keşlə”dən ayrılmaq təhlükəsindən gedir. Paraqvaylı yarımmüdafiəçi ötən ilin yayında Krayova “Universitatya”sından icarəyə götürülmüşdü. Həmin icarə müqaviləsinin müddəti isə bu yay başa çatdı. Odu ki, bakılılar Sezarı yenidən heyətində saxlamaq üçün rumınlarla danışıq aparır. Danışıqlar uzun müddəti əhatə etsə də, “10 nömrə”nin məsələsi müsbət həllini tapmayıb. Ötən saylarımızın birində qeyd etdiyimiz kimi, Meza Kollinin “Keşlə”də qalmaq ehtimalı o qədər də yüksək görünmür. Rumınlar texnikalı yarımmüdafiəçinin bizimkilər üçün önəmli fiqur olduğunu bildiyindən şərtləri qəlizləşdiriblər ki, bu da normaldı.
Klubun mətbuat katibi Murad Axundov məlum məsələ ilə bağlı bunları dedi: “Sezar Meza Kolli məsələsində hansısa yenilik yoxdu. Danışıqlar və yazışmalar davam etsə də, məsələyə konkret nöqtə qoyulmayıb. Gecikirik? Onsuz da komanda toplanışa başlamayıb. Yəqin ki, hazırlıq mərhələsinin startına qədər “hə-yox”u bilinər. Özünüz də bilirsiz ki, bu cür futbolçuların danışıq prosesi müəyyən qədər vaxt aparır”.
“Keşlə” ilə müqaviləsinin müddəti başa çatan və klubdan ayrılan Ruslan Qurbanov isə AFFA-ya şikayət etməyə hazırlaşır. Səbəb təcrübəli futbolçunun “Keşlə”dən almalı olduğu pula sahib çıxa bilməməsidi. İş burasındadı ki, Qurbanov “qırmızılar”la anlaşanda müqavilə şərtlərinə avrokuboklarla bağlı bənd salınıb. Ki, komanda mövsümün sonunda beynəlxalq arenalarda oynamaq imkanı qazansa, Ruslana buna görə əlavə mükafat veriləcək. Lakin çempionatın başa çatması ilə bağlı qərarın üstündən xeyli vaxt ötsə də, futbolçu haqq etdiyi pula qovuşa bilmir. Buna görə klubu qınayır, AFFA və FİFA-ya şikayətlə hədələyir. Paytaxt təmsilçisinin mətbuat katibini dinləyək: “Keşlə” klubu olaraq Ruslan Qurbanovun qarşısında heç bir müqavilə öhdəliyimiz qalmayıb. Bütün öhdəliklər yerinə yetirilib. Detallı şəkildə sizə sabah məlumat verə bilərəm”.
HƏBİB