Bilindiyi kimi, UEFA ilk növbədə daxili yarışların – milli çempionatlar və ölkə kubokunun başa çatdırılmasını vacib sayır. Bunun üçün federasiyalara iyulun sonuna, ya da avqustun 3-nə qədər vaxt verilmişdi. Qitə futbol qurumu, təbii ki, avrokuboklar mövsümünü də başa vurmaqda qərarlıdı.
Pandemiya səbəbindən AÇ-2020-nin final mərhələsini birilliyə təxirə salan təşkilatın İcraiyyə Komitəsi aprelin 23-də videogörüntü formatında keçirilən iclasında qitə kuboklarında mübarizəni avqustda sona çatdırmaq qərarını vermişdi. Artıq bunun üçün mövsümün qalan hissəsinin təqvim variantı hazırlanıb. Bununla bağlı UEFA rəhbərliyi və Avropanın bir sıra klub prezidentlərinin çərşənbə günü keçirilən qeyri-rəsmi videokonfransında açıqlama verilib. Tədbirdə avrokubokların qalan hissəsinin bərpası üçün milli çempionatların iyulun sonunadək yekunlaşdırılmalı olduğu bildirilib. Avrokuboklarda mövsümün qalan hissəsi üçün təklif edilən təqvim layihəsini nəzərinizə çatdırırıq.
Çempionlar Liqası
1/8 finalın qalan cavab oyunları: 7-8 avqust
Bavariya (Almaniya) - Çelsi (İngiltərə, ilk oyun - 3:0)
Barselona (İspaniya) - Napoli (İtaliya, 1:1)
Mançester Siti (İngiltərə) - Real (İspaniya, 2:1)
Yuventus (İtaliya) - Lion (Fransa, 0:1)
1/4 final: ilk oyunlar 11-12 avqust, cavab görüşləri 14-15 avqust
Yarımfinal: ilk oyunlar 18-19 avqust, cavab görüşləri 21-22 avqust
Final: 29 avqust
Avropa Liqası
1/8 finalın qalan ilk oyunları: 2-3 avqust
Sevilya (İspaniya) - Roma (İtaliya)
İnter (İtaliya) - Xetafe (İspaniya)
1/8 finalın qalan cavab oyunları: 6 avqust
Vulverhempton (İngiltərə) - Olimpiakos (Yunanıstan, 1:1)
Bayer-04 (Almaniya) - Reyncers (Şotlandiya, 3:1)
Şaxtyor (Ukrayna) - Volfsburq (Almaniya, 2:1)
Mançester Yunayted (İngiltərə) - LASK (Avstriya, 5:0)
Bazel (İsveçrə) - Ayntraxt (Frankfurt, Almaniya, 3:0)
Kopenhagen (Danimarka) – İstanbul BŞ (Türkiyə, 0:1)
Roma (İtaliya) - Sevilya (İspaniya)
Xetafe (İspaniya) - İnter (İtaliya)
1/4 final: ilk oyunlar 10 avqust, cavab görüşləri 13 avqust
Yarımfinal: ilk oyunlar 17 avqust, cavab görüşləri 20 avqust
Final: 26 avqust
Qeyd edək ki, Çempionlar Liqasının yarımfinal oyunları da İstanbulda keçirilə bilər. UEFA bununla bağlı Türkiyə Futbol Federasiyasına (TFF) müraciət edib. TFF-nin isə buna müsbət cavab verdiyi bildirilir. Avqustda başa çatması planlaşdırılan avrokubok oyunları üçün bir neçə variant nəzərdən keçirilir. Planlardan biri də ÇL-in yarımfinal matçlarını Türkiyədə keçirməkdi. Xatırladaq ki, turnirin 2019/20 mövsümünün finalı əvvəlcədən İstanbuldakı “Atatürk Olimpiya” stadionuna təyin olunmuşdu. UEFA-nın ilkin variantında Avropa Liqasının yarımfinal və final matçlarının Polşanın Qdansk şəhərində keçirilməsi də nəzərdə tutulub.