Elnur Qasımov: “Hamıya məlumat vermişəm, vəziyyətin necə olduğunu bildirmişəm”
Bir neçə gün əvvəl futzal üzrə yüksək liqada mübarizə aparan “Premier Quba”nın fəaliyyətini dayandıracağını xəbər vermişdik. Komanda 16-cı turda “Yasamal İSK” ilə oyunda iştirak etməmiş, klub prezidenti Elnur Qasımov təzyiqlər üzündən bundan sonrakı oyunlarda iştirak edə bilməyəcəklərini açıqlamışdı. Amma komanda 17-ci turun “Marafon”la oyununda iştirak etdi. “Premier Quba” bu qarşılaşmada böyük hesabla məğlub oldu – 5:19.
Dünən klubun prezidenti Elnur Qasımovla danışıb, son durumla maraqlandıq, həmçinin klubun fəaliyyətini dayandırdığını açıqlamasına baxmayaraq, “Marafon”la oyunda iştirakının səbəbini öyrəndik. Qasımov mövsümü başa vurmaq üçün çalışdıqlarını bildirdi: “Rəqibimiz güclü idi, istəmədik ki, insanlar “rəqibdən qorxdular, gəlmədilər”, - deyə fikirləşsinlər. Onsuz da "Yasamal İSK" “dişimizə görə” rəqib idi. Bu komandayla oyuna çıxıb, qələbə qazanıb "Marafon"la qarşılaşmada iştirak etməsəydik, insanlar bizim çəkindiyimizi düşünəcəkdilər. O ki qaldı komandanın durumuna, hələ ki hər şey olduğu kimidi, heç bir dəyişiklik yoxdu. Maraqlanan yoxdu. Hamıya məlumat vermişəm, vəziyyətin necə olduğunu bildirmişəm. Çalışacağıq ki, mövsümün sonuna qədər mübarizə aparaq. Qismət olsa, bu çempionatı başa vurmaq istəyirik".
AYGÜL