Bugünlərdə “Sumqayıt”ın bazasında oğurluq baş verib. Kluba yaxın mənbələrdən əldə etdiyimiz bilgiyə görə, bazar günü axşam saatlarında naməlum şəxs “Sumqayıt” Futbol Akademiyasının rəhbəri Hakan Sünal və menecer Fərhad Həsənovun otağına pəncərədən daxil olaraq, onlar məxsus noutbukları oğurlayaraq aradan çıxıb. Mənbəimiz onu da bildirdi ki, həmin vaxt stadionun gözətçisi iş başında olsa da, oğurluq edən şəxsi görməyib. Müşahidə kameralarının qeydə aldığı görüntülərdə isə oğrunun əlində kompüterlər sakit halda stadionu tərk etdiyi görünür. Ancaq müşahidə kamerları həmin şəxsi arxadan çəkib. Mənbəmiz onu da bildirdi ki, oğurluqla bağlı polisə məlumat verilib və hüquq-mühafizə orqanlarının əməkdaşları hadisə yerinə baxış keçiriblər, əl izlərini götürüblər.
Məsələ ilə bağlı “kimyaçılar”ın mətbuat katibi Rəşad Məmmədovla danışmaq istəsək də, həmkarımız gün ərzində zənglərimizi cavabsız qoydu. Yeri gəlmişkən, kompüteri oğurlanan Hakan Sünal bu arada Almaniyaya səfər edib.
RƏŞAD