Fevralın 18-də AFFA-nın İntizam Komitəsinin iclası keçirilib. Toplantı premyer-liqanın 17-ci, birinci divizionun isə 15-ci turunun oyunlarında qeydə alınan qayda pozuntularının müzakirəsinə həsr olunub.
Premyer-liqa klublarından “Zirə”nin cəzası ağır olub ki, bu da gözlənilən idi. “Qarabağ”la oyunda darmadağına məruz qalan qəsəbə təmsilçisi 67-ci dəqiqədə azlıqda qalmışdı. Cavid Hüseynov hakimi təhqir etdiyinə görə birbaşa qırmızı vərəqə alaraq meydandan kənarlaşdırılmışdı ki, komitə onu 4 oyunluq diskvalifikasiya edib. Kluba isə 3200 manat cərimə kəsilib.
“Səbail” – “Qəbələ” oyununda ikinci xəbərdarlıqdan sonra meydandan qovulan qonaq komandanın üzvü Fernan Lopes canını 1 oyun və 200 manat cərimə ilə qurtarıb. “Neftçi” və “Sabah” isə son turda vərəqə sayının çoxluğuna görə hərəyə 800 (cəmi 1600) manat “tərləyib”.
Diviziona gəlincə, “Zaqatala” – “Qarabağ-2” oyununda qonaqların 6 futbolçusu sarı vərəqə alıb ki, bu da 80 manat cərimə deməkdi. Oyunun 65-ci dəqiqəsində “Qarabağ-2”nin azarkeşləri tərəfindən pirotexniki vasitədən istifadə olunub ki, buna görə Ağdam klubu daha 80 manat ziyana düşüb.
“Sabah-2” ilə qarşılaşmanın ikinci hissəsi “Zirə-2”nin paltardəyişmə otağını gec tərk etməsi səbəbindən 5 dəqiqə gec başlayıb. Buna görə klub 80 manat cərimələnib. Oyunda azarkeşlər üçün tibbi xidmət təşkil edilmədiyinə görə “Zirə-2” daha 80 manat ödəyəcək. “Sabah-2” isə elektron protokolu vaxtında təqdim etmədiyi üçün bir o qədər ziyana düşüb.
“Kəpəz” – “Keşlə-2” oyunu meydan sahiblərinə 320 manata başa gəlib. Qərb təmsilçisi sarı vərəqələrin çoxluğu, xərək daşıyanların yaşının 18-dən aşağı olması, elektron protokolu vaxtında təqdim etməməsi və top daşıyan şəxslərin sayının əsasnamədə qeyd olunandan az olması “maddələr”inin hər birinə görə 80 manat cərimə olunub.
“Neftçi-2” – “Sumqayıt-2” oyununun 79-cu dəqiqəsində qonaq komandanın üzvü Eldost Qiyasbəyli rəqibi aşkar qol vurmaq imkanından məhrum etdiyinə görə birbaşa qırmızı vərəqə alaraq meydandan kənarlaşdırılıb. Buna baxmayaraq, o, 1 oyun cəza alıb, klubu 20 manat cərimə olunub. Meydan sahibinin təqdim etməli olduğu 2 ədəd elektron əvəzetmə tablosu oyun vaxtı işləmədiyinə, həmçinin diktor olmadığına görə “Neftçi-2” ümumilikdə 80 manat cərimələnib.
“Qaradağ Lökbatan” – “Turan Tovuz” oyununda “Qaradağ Lökbatan”ın 5 futbolçusu sarı vərəqə ilə cəzalıb. Bu da 80 manat deməkdi. “Turan Tovuz”u isə Əzəmət Ələkbərli 20 manat “tərlədib”. İkinci “sarı”dan sonra komandasını azlıqda qoyan futbolçu növbəti turu da buraxmalı olacaq.
Beləliklə, dünənki iclasda çıxarılan qərarlar nəticəsində klublar 5920 cərimələnib. Nəticədə mövsümün əvvəlindən cərimə sanksiyaları üzrə nəzərdə tutulan məbləğ 95360 manata çatıb.
