Dünən gənclər və idman naziri Azad Rəhimov yanvarın əvvəlində yaradılan İdman Jurnalistləri Federasiyasının İdarə Heyətinin üzvləri ilə görüşüb. Görüş zamanı yeni təşkilatın yaranması münasibətilə İdarə Heyəti üzvlərini təbrik edən nazir idman mediasının inkişafına xidmət edəcək belə qurumun yaradılmasına çoxdan ehtiyac yarandığını bildirib.
İdman jurnalistlərinin nazirliyə müntəzəm müraciətlərini nəzərə alaraq, yeni təşkilatın yaranmasına dəstək olduğunu bildirən nazir həm indiki durumla bağlı fikirlərini bölüşüb, həm də AİJF-yə fəaliyyətində uğurlar arzulayıb. Onun fikrincə, idman jurnalistləri də yeni dövrün çağırışlarına cavab verməli, daha hazırlıqlı olmalıdılar.
İdarə heyətinin sədri Qabil Mehdiyev qurumun yaradılmasına verdiyi dəstəyə görə nazirə idman jurnalistləri adından təşəkkür edib. İdarə heyəti üzvlərini təqdim edən Qabil Mehdiyev artıq iki iclasın keçirildiyini və bir sıra qərarlar qəbul edildiyini, müvafiq komissiyalar yaradıldığını bildirib.
Görüş zamanı Gənclər və İdman Nazirliyi ilə İdman Jurnalistləri Federasiyası arasında əməkdaşlıq məsələləri müzakirə olunub. Həmçinin nazirə yeni qurumun bu il üçün tədbirlər planı, eləcə də başqa federasiyalar və idman qurumları ilə birgə görülməsi nəzərdə tutulan işlər barədə məlumat verilib.