Türkiyə çempionatının 1-ci liqasında 14-cü turun oyunları keçirilib. Yığmamızın sabiq üzvü Ufuk Budakın formasını geydiyi “Altınordu” doğma meydanda “Adanaspor”a 1:0 hesabıyla qalib gəlib. Ufuk da bu görüşün iştirakçısı olub. O, start heyətində meydana çıxıb və sonadək mübarizə aparıb. “Altınordu” hazırda 13 xalla 18 iştirakçı arasında 14-cü pillədə qərarlaşıb.
Portuqaliya çempionatında 13-cü turun oyunları baş tutub. Renat Dadaşovlu “Pakuş Ferreyra” da növbəti matçına çıxıb. Sözügedən kollektiv doğma meydanda “Setubal”a uduzub - 2:3. Renat bu görüşün iştirakçısı olmayıb. O, sona qədər ehtiyatda qalıb. “Pakuş Ferreyra” 8 xalla 18 kollektiv arasında 17-ci yerdədi.
Ukrayna premier-liqasında 17-ci turun oyunları çərçivəsində Pavel Paşayevin formasını geydyi “Aleksandriya” doğma meydanda “Vorskla” ilə münasibətləri aydınlaşdırıb. Futbolçumuzun komandası bu görüşdən qələbə ilə ayrılıb – 3:0. Start heyətində meydana çıxan Pavel sonadək mübarizə aparıb. Millimizin üzvü 17-ci dəqiqədə sarı vərəqə ilə də cəzalanıb. “Aleksandriya” 30 xalla 12 kollektiv arasında 5-ci pillədə qərarlaşıb.
Albaniya çempionatında 14-cü turun oyunları reallaşıb. Eltun Turabovun şərəfini qoruduğu “Biliş” doğma meydanda “Partizani” ilə qarşılaşıb. Futbolçumuzun komandası bu oyundan qələbə ilə ayrılıb – 2:1. Eltun qarşılaşmanın iştirakçısı olmayıb. “Biliş” 23 xalla 10 komanda arasında 3-cü pillədə qərarlaşıb.
Almaniyanın ikinci bundesliqasında 16-cı turun oyunları gerçəkləşib. Dmitri Nazarovlu “Ertsgebirge” səfərdə “Hannover”lə münasibətləri aydınlaşdırıb. Qonaqlar bu görüşdə 2:3 hesabıyla uduzub. Start heyətində meydana çıxan Nazarov 85-ci dəqiqədə əvəzlənib. Yarımmüdafiəçi meydanı tərk edərkən hesab 2:2 olub ki, onun yoxluğunda komandası daha bir top buraxaraq meydandan məğlub ayrılıb. 16 oyundan sonra hesabında 23 xalı olan Aue təmsilçisi 6-cı pillədə qərarlaşıb.
İspaniya sequndasında 19-cu turun oyunları keçirilib. Eddi İsrafilovun formasını geydiyi “Albasete” doğma meydanda “Ekstremadura” ilə heç-heçə edib – 1:1. Start heyətdə meydana çıxan yığmamızın üzvü sonadək mübarizə aparıb. Eddi 33-cü dəqiqədə sarı vərəqə ilə də cəzalanıb. “Albasete” 27 xalla 8-ci pillədə qərarlaşıb.