Müşfiq Hüseynov şəxsi avtomobili ilə Quzanlıya yollanıb
“Qarabağ”ın azarkeş qrupu “İmarət”in onilliyi ilə bağlı Ağdama səfər edəcəyini ötən saylarımızda xəbər vermişdik. Azarkeş qrupu noyabrın 17-də Ağdama səfər edərək, orda böyük bir tədbir keçirib. Tədbirdə azarkeşlərlə yanaşı, rayon rəhbərliyi, müğənnilər və Ağdamın ziyalıları da iştirak edib. Səfər təəssüratını öyrənmək üçün azarkeş qrupunun İdarə Heyətinin üzvü Elnur Quliyevlə əlaqə saxladıq: “Noyabrın 17-si səhər saatlarında üç avtobusla Ağdama yollandıq. Bizimlə yanaşı, “Qarabağ”ın köməkçi-məşqçisi - əfsanəmiz Müşfiq Hüseynov da öz şəxsi avtomobiliylə Ağdama getdi. Quzanlıya çatan kimi, orda şəhidlərin xatirəsinə ucaldımış abidə var, əvvəlcə oranı ziyarət etdik. Müxtəlif şüarlar səsləndirdik, şəkillər çəkdirdik. Rayonda bizi İcra Hakimiyyətinin başçısı qəbul etdi. Hər cür kömək göstərməyə hazır olduğunu bildirdi. Azarkeş qrupu olaraq ilk məqsədimiz hərbi hissəyə yollanıb, əsgərlərlə görüşmək idi. Bunun üçün nazirlikdən icazə də almışdıq. Sağ olsun, hərbi bloqqer Tofiq Şahmuradov bu məsələni həll etmişdi. Rayon rəhbərliyi təhlükəsizliyimiz üçün polis də ayırmışdı. Polis maşınlarının müşayiəti ilə hərbi hissələrdən birinə yollandıq. Onu da deyim ki, rayonda bizə daha 3-4 maşın qoşuldu. Hərbi hissədə əsgərlərlə görüşdük, onlara apardığımız müəyyən sovqatları təqdim etdik. Həqiqətən hərbi hissədə çox gözəl şərait yaradılıb. Uşaqlardan bəziləri əsgərlərlə futbol da oynadı. Daha sonra isə rayonun mədəniyyət evinə gəldik. Orda rayon rəhbərliyi tərəfindən onilliyimizlə bağlı böyük tədbir keçirildi. Tədbirdə başçının müavini, rayon təhsil şöbəsinin müdiri və “İmarət”in ideoloji rəhbəri Vasif Qurbanzadə çıxış etdi. Çıxışlar arasında müğənnilər də oxuyurdu. Olduqca gözəl və maraqlı tədbir keçdi. “Qarabağ”ın heç bir oyunçusu bizimlə Ağdama getməmişdi. Çünki onlara bizimlə getmələrini təklif etməmişdik. Çox sıx qrafikdə olduqları üçün buna ehtiyac duymadıq. Ancaq Müşfiq müəllim sağ olsun, bizə qoşuldu, vaxtını ayırdı. Hətta rayon rəhbəri bizə stol açmağı, qonaqlıq da təklif etdi. Ancaq vaxt məhdudiyyəti olduğu üçün Bakıya qayıtmalı olduq”.
HƏSƏN