“Qarabağ” – APOEL oyununu qonaqların üç futbolçusu – Musa Əl-Tamari, Joazinyo və Tomas de Visenti müxtəlif səbəblərdən buraxmışdısa, Xayme Romero ağdamlılara kömək edə bilməmişdi. Buna səbəb isə ispan yarımmüdafiəçinin oyundan əvvəl qəfil zədə almasıydı.
Bu gün Azərbaycan derbisinin baş tutacağını, noyabrın 7-də APOEL-lə Nikosiyadakı qarşılaşmanı nəzərə alsaq, Xaymenin durumu sual doğurmaya bilməz. Son vaxtlar formada olan “9 nömrə”nin son durumu ilə bağlı məlumat almaq üçün klubun mətbuat katibi Nurlan İbrahimovu aradıq. “Qarabağ”ın sözçüsü Romeronun srağagün və dünən komanda ilə məşq etdiyini bildirdi. Lakin bu onun “Neftçi”yə qarşı oynayacağı anlamına gəlməməlidi. Baş məşqçi Qurban Qurbanov futbolçunun son durumuna nəzər salandan, həkimlərin rəyini öyrənəndən sonra qərarını verəcək. Zədəsini yeniləməsə, APOEL-lə görüşdə meydanda olacağını təxmin edə bilərik.
Yayda uzun müddətə sıradan çıxan Filip Ozobiç isə Xorvatiyadakı müalicəsini başa vuraraq Bakıya qayıdıb. Filip hazırda fərdi qaçışla kifayətlənir. Buna baxmayaraq, kollektiv çalışmalara nə vaxt qoşulacağı, yaşıl meydanlara nə vaxt qayıdacağı dəqiq bilinmir. Dəqiq bilinən odu ki, rəsmi oyunlarda top dalınca qaçması ən azı yaxın iki həftə ərzində baş verməyəcək.
HƏBİB