Alesionun sərəncamında beş braziliyalı da var
Dünya çempionatının əsas mərhələsinin oyunlarına hazırlaşan futzal üzrə milli komandamız dünəndən Bakıda təlim-məşq toplanışına başlayıb. Yığma hazırlığa geniş heyətlə - 20 oyunçu ilə start verib. Budəfəki siyahıda braziliyalılarla yanaşı, iranlılar da var. Başqa sözlə, cənub qonşumuzdan olan 4 futzalçı “milliləşdirilib”. Onlardan 3-ü “Araz”ın üzvləridi. Söhbət Hadi Əhmədi, Vahid Şəfeyi və Əmir Şocayi, həmçinin hazırda klubsuz olan İsaq Surqalıdan gedir. Ancaq bu o demək deyil ki, onların hamısı DÇ-də forma geyəcək. Joze Alesio da Silva onlardan bir-ikisini komandada saxlayacaq. Ümumiyyətlə, 20 nəfərlik heyətdən 14-ü DÇ üçün sifariş olunacaq. Baş məşqçi toplanışa bu futzalçıları dəvət edib: Rövşən Hüseyinli, Kamran Hacıyev, Nihad İsmayılov, Xətai Bağırov, İsa Atayev, Rizvan Fərzəliyev, Ramiz Çovdarov, Hadi Əhmədi, Vahid Şəfeyi, Əmir Şocayi (hamısı “Araz”) Elnur Zamanov, Oktay Rüstəmli (hər ikisi “Neftçi” İK), Vitali Borisov (Marafon), Faiq Əliyev (EKOL), Tyaqo Teles (“Norliski Nikel”, Rusiya), Everton Kardoso (“Levante”, İspaniya), Eduardo Borges (ACCS, Fransa), Vassura (“Əl-Ərəbi”, Küveyt), Vilela (“Kopaqril”, Braziliya), İsaq Surqalı (klubsuz).
Bu gün Bakı İdman Sarayında millinin mətbuat üçün açıq məşqi keçiriləcək. Saat 10.30-da start veriləcək məşqdən 15 dəqiqə əvvəl baş məşqçinin və bir oyunçunun iştirakı ilə brifinq təşkil olunacaq.
Qeyd edək ki, yığmamız DÇ-2020-nin əsas mərhələsi çərçivəsində oktyabrın 23-də Moldova, 24-də Monteneqro, 26-da isə Slovakiya yığmaları ilə qarşılaşacaq. Bakı İdman Sarayında keçiriləcək bütün oyunlara saat 20.00-da start veriləcək.
Qrupun oyun cədvəlini nəzərinizə çatdırırıq:
23 oktyabr
Slovakiya – Monteneqro
Bakı İdman Sarayı. Saat 17.00
Azərbaycan – Moldova
Bakı İdman Sarayı. Saat 20.00
24 oktyabr
Moldova – Slovakiya
Bakı İdman Sarayı. Saat 17.00
Azərbaycan – Monteneqro
Bakı İdman Sarayı. Saat 20.00
26 oktyabr
Monteneqro – Moldova
Bakı İdman Sarayı. Saat 17.00
Slovakiya – Azərbaycan
Bakı İdman Sarayı. Saat 20.00
MİRAĞA