Rossi bəxtlərinin gətirdiyini etiraf etdi
Macarıstan – Azərbaycan qarşılaşmasından sonra hər iki yığmanın çalışdırıcısı 90 dəqiqə ilə bağlı fikirlərini bildirib. Jurnalistlər önünə öncə Nikola Yurçeviç çıxıb. Hesaba alınmayan son dəqiqə qolumuza görə hədsiz üzgün görünən xorvat çalışdırıcının fikirləri, demək olar, ancaq həmin epizodla bağlı olub.
* Burda danışmaq asan deyil. Bunun bir çox səbəbi var. İlk növbədə rəqibi təbrik edir və uğurlar arzulayıram. Oyunun axarı barədə çox deyəsi bir şey yoxdu. Matçdan sonra 50-dək mesaj almışam. Bütün macarıstanlı jurnalistlər təmiz qolumuzun verilmədiyini bildirirlər. İnanılmaz səhv idi. Ən çox oyunçularıma görə üzülürəm. Onların əziyyəti yerə vuruldu. Azərbaycan kiçik ölkədi, futbolda elə də söz sahibi deyil. Belə əziyyətin ucuzlaşması sözə layiq deyil. VAR sisteminin xeyri var. Çox danışsam, işimi itirə bilərəm. Bunları deməli, içimdəki acığı çıxarmalı idim. Dostlarla, ailə ilə söhbət edəcəyik. Macarıstanlı jurnalistlərə səmimiyyətlərinə görə təşəkkürümü bildirirəm.
* Oyundan sonra referiyə yaxınlaşıb qolun niyə hesaba alınmadığını soruşdum. O isə qərarında haqlı olduğunu və bunun görüşün ardından epizoda baxdıqda sübut olunacağını iddia etdi.
* İlk hissə istədiyimiz kimi alınmadı. Fasilədə futbolçulara vəziyyəti dəyişməyin mümkünlüyünü bildirdim. İlk 45 dəqiqədə komandam bir qədər ehtiyatlı idi. Bilirdik ki, 1:0-dan sonra dönüş etmək mümkündü. Onlara daha cəsarətli oynamağı tapşırdım. İkinci hissədə Macarıstan üçün çətin oyun oldu.
* Bəhlul cəmi bir aydı yığmanın əsas heyətində oynasa da, istedadlı futbolçu olduğunu göstərməyə başlayıb. Mustafazadə Xorvatiyaya qarşı da gözəl oynamışdı. Yəqin ki, sayılmayan qoluna görə məyusdu. Bu barədə özü ilə söhbət edəcəm. Amma inanıram ki, bundan da özü üçün müsbət nəticə çıxaracaq.
Rəqib çalışdırıcı Marko Rossi Yurçeviçi bir xeyli qapının arxasında gözlədikdən sonra zala daxil olub və maraqlıdı ki, bəxtlərinin gətirdiyini etiraf edib.
* 75 dəqiqəni yaxşı keçirdik, sonra isə yorulduq. Rəqib bundan yararlanaraq qol vurdu. Xoşbəxtlikdən qol sayılmadı. Orda nə baş verdiyini görmədim. Qısa deyim, bəxtimiz gətirdi. Hakim səhvindən danışırıqsa, bizim Macarıstan - Slovakiya oyununu da yada salaq.
* Hədsiz əsəb və həyəcan içindəydim. Vaxtında 2-ci qolu vurmalıydıq, lakin bacarmadıq. 4-5 real qol şansını əldən verdik. Hədsiz rahatlıq var idi, yaxşı ki, cəzasını çəkmədik.
* Azərbaycan millisi ötən yay Xorvatiya ilə 1:1 hesablı heç-heçə edib, Uelsə son dəqiqələrdə buraxdıqıları qol hesabına uduzmuşdular. Bu gün də fasilədən sonra göstərdikləri əzmkarlıq və vurduqları qol hesabına təhlükəli rəqib olduqlarını göstərdilər. Azərbaycanı qiymətləndirməmək olmaz, onlar asan rəqib deyil. Xorvatiyaya yenilgidən sonra utanırdım, bu gün isə yetirmələrimlə fəxr edirəm.
* Xorvatiyaya uduzduğumuz görüşdə inanılmaz səhvlərə yol vermişdik. Amma unutmayaq ki, çox güclü futbolçulara, dünyanın ikinci ən güclü komandasına qarşı çıxış etmişdik. Üstəlik, biz heç də dünyanın ən yaxşı heyətinə malik deyilik. Nə mən ən yaxşı baş məşqçiyəm, nə də mənim futbolçularım dünyanın ən yaxşılarıdı. Ötən məğlubiyyətdən dərs çıxarmışdılar deyə, bu gün daha çox qaçdılar, kifayət qədər aqressiv görünürdülər.
HƏBİB hazırladı
