“Zirə”nin yeni baş məşqçisi müəyyənləşib. Komandanı mövsümün sonunadək Zaur Həşimov çalışdıracaq. 38 yaşlı mütəxəssis buna qədər “Qəbələ”də baş məşqçi vəzifəsini tuturdu. Lakin o, bu funksiyanı icra etmirdi. Belə ki, Sənan Qurbanovun istefasından sonra komandanı qəbul edən Elmar Baxşıyevin PRO kateqoriyası olmadığı üçün sənəddə baş məşqçi Zaur Həşimov göstərilirdi. Həşimov üçün “Zirə” yad komanda sayılmır. O, Ayxan Abbasov bu komandanı çalışdırdığı dövrdə onun köməkçisi olub.
Zaur Həşimov klubun rəsmi saytına açıqlama verib: “Mənim üçün bir az gözlənilməz, amma xoş bir təklif oldu. Əvvələr də “Zirə”də çalışmışam. Bu klub mənim üçün doğmadı. “Zirə”də çalışanları da tanıyıram, bura mənə yad deyil. Çalışacam mənə tapşılıran işi uğurla yerinə yetirim. Köməkçilərimdən yalnız qapıçıların hazırlığı üzrə məşqçi Anar Niftəliyevin adı məlumdu. Başqalarının kimliyinə isə yaxın günlərdə aydınlıq gələcək”.