Almaniyanın 2-ci bundesliqasında 9-cu turun oyunları keçirilib. Dmitri Nazarovun şərəfini qoruduğu “Ertsgebirge” səfərdə “Sandhauzen”lə qarşılaşıb. Futbolçumuzun komandası bu oyundan heç-heçə ilə ayrılıb – 2:2. Start heyətində meydana çıxan yığma üzvü 70-ci dəqiqədə əvəzlənib. 15 xala malik “Ertsgebirge” 4-cü pillədə qərarlaşıb.
Fərid Nəbiyevin formasını geydiyi “Slaviya” Çexiyanın gənclər liqasında növbəti oyuna çıxıb. 9-cu tur çərçivəsində səfərdə “Motorlet”lə baş tutan oyun futbolçumuzun komandasının məğlubiyyəti ilə bitib – 1:2. Fərid start heyətində meydana çıxıb və fasilədə əvəzlənib. “Slaviya”nın U-21 komandası 15 xalla beşincidi.
Latviya çempionatının 32-ci turu çərçivəsində Vüqar Əsgərovun formasını geydiyi “Liepaya” doğma meydanda “Metta” ilə üz-üzə gəlib. Futbolçumuzun komandası bu oyundan qələbə ilə ayrılıb (2:1). Vüqar 46-cı dəqiqədə meydana çıxıb. “Liepaya” 35 xalla 6-cı yerdədi.
Litvanın 1-ci liqasında 27-ci turun oyunları gerçəkləşib. Kamran Quliyevin “Jonava”sı səfərdə “Vitis”ə 2:3 hesabı ilə məğlub olub. Cari mövsümdə 10 qol vuran futbolçumuzun adı qarşılaşmanın iştirak ərizəsinə salınmayıb. “Jonava” 37 xalla 8-ci pillədə qərarlaşıb.
Albaniya çempionatının 7-ci turunda Eltun Turabovlu “Biliş” səfərdə “Laçi” ilə qolsuz heç-heçəyə razılaşıb. Eltun bu görüşün iştirakçısı olmayıb. Komandasının əsas heyət üzvü olan futbolçu ötən tur aldığı zədə üzündən qarşılaşmanı buraxıb. “Biliş” 12 xalla liderdi.
Ukrayna premyer-liqasında 10-cu turun oyunları baş tutub. Pavel Paşayevin formasını geyindyi “Aleksandriya” da növbəti matçına çıxıb. Sözügedən komanda doğma meydanda “Karpatı”ya qalib gəlib – 2:1. Paşayev meydanda yaşananları ehtiyatdan izləyib. “Aleksandriya” 19 xalla dördüncüdü.
Moldova çempionatında 24-cü turun oyunları keçirilib. Nurlan Novruzovlu “Dinamo-Avto” səfərdə “Şerif”lə qarşılaşıb. Futbolçumuzun komandası 0:2 hesabı ilə uduzub. Nurlan oyunu sonadək ehtiyatdan izləyib. “Dinamo-Avto” 31 xalla 5-ci pillədə qərarlaşıb.
Türkiyənin 1-ci liqasında 7-ci turun oyunları çərçivəsində Ufuk Budakın formasını geydiyi “Altınordu” səfərdə “Ərzurumspor”a məğlub olub – 0:1. Ufuk oyunu əvəzlənmədən keçirib. O, 90+3-cü dəqiqədə sarı vərəqəylə də cəzalanıb. “Altınordu” 5 xalla 15-cidi.
Rüfət Dadaşovlu “Proyssen” Almaniyanın 3-cü bundesliqasının 11-ci turunda “Unterhahinq”lə səfərdə münasibətləri aydınlaşdırıb. Dadaşov komandası 1:2 hesabı ilə geridə olarkən, 83-cü dəqiqədə penaltini dəqiq yerinə yetirib və “Proyssen”i məğlubiyyətdən xilas edib. Münster klubu 10 xalla 18-ci pillədə yer alıb.
İspaniya sequndasının 10-cu turunda Eddi İsrafilovlu “Albasete” səfərdə "Alkorkon"la qarşılaşıb. Görüş qonaqların 1:0 hesablı qələbəsi ilə başa çatıb. İsrafilov oyunu əvəzlənmədən keçirib. “Albasete” 16 xalla dördüncüdü.