Premyer-liqanın 5-ci turunda “Səbail”lə görüşəcək “Qəbələ” səfər matçına hazırlığı davam etdirir. “Qırmızı-qaralar”ın kapitanı Anar Nəzirov sentyabrın 21-dəki görüşlə bağlı klubun saytına açıqlama verib: “Səbail”lə qarşılaşmaya yaxşı hazırlaşmağa çalışırıq. Bizim üçün hər oyun çox vacibdi. Səfərdə oynayacağımız bu matçdan yaxşı nəticə ilə ayrılmaq istəyirik. Arxada qalan 4 turda yalnız bir qələbə qazanmışıq. Bu da demək olar ki, çox azdı. Hər matç final xarakteri daşıyır. Əlimizdən gələni edib, ən yaxşı oyunumuzu nümayiş etdirib, səfərdən lazım olan xal, qələbə ilə dönmək niyyətindəyik. Əlbəttə, “Sabah” üzərində ötən turda qazanılan qələbə bizim üçün çox vacib idi. Bu, komandaya əlavə özünəinam bəxş etdi. Çünki buna qədər həm qol vura bilmirdik, həm də xal qazanmırdıq. Səfərdə isə qol da vurduq, qələbə də qazandıq. Bundan sonra hər şey qaydasına düşdü. “Səbail” turnir cədvəlində də üst pillələrdə qərarlaşıb. Güclü komandadı. Hər görüşdə sürpriz etməyə qadir komandadı. İstəyimiz odu ki, onlarla matçda da əlimizdən gələni edərək, qalib gələk”.