“İ-Ticket” “qara bazar”ın işbazları üçün şərait yaradır
Yığma və klub səviyyəsindəki təmsilçilərimizin beynəlxalq oyunlar zamanı adlı-sanlı rəqiblərlə qarşılaşmasına azarkeşlərdən çox işbazlar sevinir. Futbolsevər sevinc hissi ilə yanaşı, azarkeşlik etdiyi komandanın məğlub olmaq ehtimalını da göz önünə alıb ikili hisslər keçirirsə, işbazları öz məqsədi maraqlandırır: pul qazanmaq!
İllərdi bu mövzuda yazırıq, zaman-zaman ortaya faktlar qoymuşuq, di gəl ki, dərdə dərman tapılmır. Söhbət “qara bazar”dakı işbazların əməllərindən gedir. Srağagün, yəni “Qarabağ” – “Sevilya” qarşılaşmasından əvvəl rayonda yaşayan yaxın tanışın xahişi ilə Respublika stadionunun kassasına yaxınlaşmışdım. 3, uzağı 5 manatlıq bilet almaqda maraqlıydım. Pəncərəyə yaxınlaşan kimi satıcıdan kassada yalnız 15 və 20 manatlıq biletlərin qaldığını öyrəndim. Məyus halda ərazini tərk edirdim ki, bir nəfər yaxınlaşdı: “qaqa, bilet lazımdı”?
- Aha, bilet istəyirəm.
- Məndə var.
- Neçə manatlıq?
- 10 manata.
- Baxım.
- Baxım deyəndə ki, 5 manatlıq biletdi, 10-a satıram.
- 3 manatlıq var?
- Bəli, varımdı.
- Onu neçəyə satırsan?
- 8 manata.
- Bahadı.
- Neçə dənə lazımdı?
- 2 dənə.
- 15 manat ver, ikisini götür.
Başımı yelləyib uzaqlaşıram. Bu an növbəti “qardaş” yaxınlaşır. Eyni mövzu, eyni sual və eyni qiymətlər. Sadəcə, bu şəxs 3 manatlıq bileti 3-dən çox alacağım halda birini 6 manatdan satacağını təklif edir. Təbii ki, razılaşmıram.
Əlbəttə, cibimdə polis orqanlarına məxsus vəsiqə olmadığından ciddi tədbir görmək istəyim ürəyimdə qalır. Əlacım olsaydı, hər ikisini maşına oturdub, “uf” demədən bölməyə aparar, qanun çərçivəsində canlarını alardım. Lakin cibimdəki jurnalist vəsiqəsiydi deyə, gücüm yalnız yazmağa çatır.
İşbazların bu əməllərini həyata keçirmək prosesi olduqca sadədi. Deməli, kassalardan bilet almaq üçün heç bir rəsmi sənəd tələb olunmur. Və hər adam maksimum 5 bilet almaqda azaddı. Odu ki, biletlər satışa çıxarılan gün alverçilər özləri ilə 5-10 nəfər götürüb düşürlər kassaların canına. Nəticədə xeyli sayda bilet əldə edirlər ki, əsl futbol azarkeşləri 3-5 manatlıq biletlərə həsrət qalır. Oyuna 2 gün qalmışdan etibarən isə biletləri 2-3 qat bahasına mənim kimi ucuz bilet axtaranlara təklif edirlər. Oyunun başlamasına dəqiqələr qalmış qiymətlər kəllə-çarxa qalxır. Əminəm ki, 3 manatlıq bileti azı 10 manata təklif edəcəklər. Üstəlik, stadiona daxil olmaq istəyən kim(lər)sə daha artığını ödəmək istəyib, əlini cibinə salacaq.
Bütün idman növlərində və bütün turnirlərdə müşahidə olunan “qara bazar”ın qarşısını almaq təkcə Azərbaycan polisi üçün yox, dünyadakı bütün güc strukturları üçün mümkünsüzə çevrilib. Hətta dünya çempionatı, Olimpiada kimi mötəbər turnirlərdə işbazlar əməllərini asanlıqla həyata keçirirlər. Sadəcə, burda sual doğuran məqam “Qarabağ”ın bu işin qarşılığında hansı tədbirlər görməsidi. Ən azı kassalara mülki geyimli ”cəsuslar” göndərmək olar, ya da biletlərin bir ələ ikidən artıq satılmamasını təmin etmək. Beyni qurdalamaqla başqa çıxış yolları tapmaq da mümkündü.
Bu səbəbdən “Qarabağ”ın mətbuat katibi Nurlan İbrahimovu aradıq ki, mövzuya şərh versin, işbazların əməllərinə münasibət bildirsin: “Dediklərinizdən xəbərdarıq. Bununla bağlı dəfələrlə bizə müraciət olub. Lakin artıq üç ildi bilet satışına klub nəzarət etmir. 2017-ci ildən bu yana bu iş “İ-Ticket”ə həvalə olunub. Çünki azarkeşlərin onlayn satışın olmaması və biletlərin yalnız bir nöqtədə satılması ilə bağlı ciddi narazılığı vardı. Biz də azarkeşlərin marağını nəzərə alıb “İ-Ticket”lə anlaşdıq. Ona görə də bu mövzuda suallarınızı adı çəkilən şirkətə ünvanlamağınızı xahiş edirik. Çünki bilet satışına cavabdehlik daşıyan onlardı”.
Növbəti sayımızda yenidən bu mövzuya qayıdacağıq.
HƏBİB
