“Oynamırlarsa, deməli, yaxşı işləməmişəm, fiziki hazırlıq aşağıdısa, yenə mənəm cavabdeh...”
Yay transfer bazarının ən fəallarından, bəlkə də ən fəalı olan “Sabah”ın çempionatda fırtına qoparacağına ümid edənlər gümanında yanıldı. Yetərincə yaxşı heyətə malik “tələbələr” ilk 4 oyunda cəmi 2 xal toplayıb ki, bu da 8 komanda arasında ən zəif göstəricidi.
Xüsusən mövsümün ən zəifi gözündə görülən “Qəbələ”yə doğma azarkeşləri önündəki məğlubiyyət komandaya azarkeşlik edənlərin səbr kasasını daşırdı. Gözləmək olardı ki, oyunsonrası mətbuat konfransında baş məşqçi Elşad Əhmədov istefa qərarını açıqlayacaq. Lakin o bunu etmədi, rəhbərliklə görüşü işarə verdi. Dünən isə…
Klub saytının yaydığı xəbərdə Elşad Əhmədovun baş məşqçi postundan ayrıldığı bildirildi. Lakin o, klubdakı fəaliyyətini davam etdirəcək. Xəbərdə deyilir: “Sabah” Futbol Klubunun baş məşqçi postunda dəyişiklik edilib. Əsas komandamızın baş məşqçisi Elşad Əhmədov bundan sonra klub prezidentinin müşaviri vəzifəsini yerinə yetirəcək. Qərar klub rəhbərliyi ilə təcrübəli mütəxəssis arasında qarşılıqlı razılıq əsasında qəbul olunub. Ötən mövsüm premyer-iqada debüt edən “Sabah”ın formalaşmasında, komandanın qurulmasında böyük əməyi olan Elşad Əhmədovun mütəxəssis kimi bilik və bacarığına klubun inkişafında ehtiyac var.
Əsas komandanın baş məşqçi postu müvəqqəti olaraq əvəzedici komandamızın baş məşqçisi Rövşən Babayevə həvalə olunub. Yaxın günlərdə klubumuzun Müşahidə Şurasının növbədənkənar iclası keçiriləcək. İclasda komandanın son nəticələri müzakirə edilməklə yanaşı, yeni baş məşqçinin təyinatı məsələsinə də baxılacaq. “Sabah” Futbol Klubu bizi dəstəkləyən bütün azarkeşlərə, sponsorlara təşəkkür edir. Hesab edirik ki, “Sabah” daha uğurlu çıxış etmək və nəticələrini yaxşılaşdırmaq üçün yaxşı potensiala malikdi”.
Qərarın baş məşqçi, yoxsa klub rəhbərliyi tərəfindən verildiyini, eləcə də komandanın qələbəyə həsrət qalmasının səbəbini öyrənmək üçün səbəbkarla danışmaq yerinə düşərdi. Həmişə mətbuata açıq olması ilə seçilən Əhmədov bu dəaə də səmimiliyini nümayiş etdirdi: “Düzünü desəm, oyundan dərhal sonra istefa vermək istəyirdim. Lakin klub rəhbərliyi ilə danışmadan bunu etmədim. Hər halda, yazılmamış etik qaydalar var, onlara əməl etməliyik. Bu gün rəhbərliklə görüşən kimi getmək istədiyimi diqqətə çatdırdım, sağ olsunlar, anlayışla qarşıladılar. Nəyisə dəyişməsən, iş düz getməz. Klub rəhbərliyinin gördüyü işlər, çəkilən əziyyət göz qabağındadı. 4 oyuna 2 xal toplayıb sonuncu pillədə qərarlaşmaq mənim üçün çox ayıbdı. Problemləri kimdəsə axtarmaqdansa, birinci mən getsəm, yaxşıydı. Günahı özümdə görürəm. Futbolçuda nə günah görə bilərəm axı? Oynamırlarsa, deməli, yaxşı işləməmişəm, fiziki hazırlıq aşağıdısa, yenə mənəm cavabdeh, qapıya düzgün zərbə vura bilmirlərsə, yaxşı işləməmişəm. Ona görə də günah sahibi özüməm. Heç bir pərdəarxası olaydan söhbət gedə bilməz. Bunu heç ağlımın ucundan da keçirmirəm. Köməkçilərin komandadakı işini davam etdirəcək. Yalnız Səttar Əliyev getmək istədiyini bildirdi və onunla yollar ayrıldı. O ki qaldı müşavir postunda, komandanın qurulmasında, formalaşmasında az da olsa, zəhmətimiz olub. Maqsud müəllim sağ olsun (“Sabah”ın prezidenti Maqsud Adıgözəlov - H.), əziyyətimi yerə vurmadı, yanında olmasını təklif etdi. Kaş bütün klublarda Maqsud müəllim kimi insanlar işləsin. Müşavir postunu tutsam da, hansısa qərarlar zamanı fikrim dinləniləcək. Müşavir o demək deyil ki, bütün gün ofisdə oturub, bayıra çıxmayacam. Ətraflı danışandan sonra konkret hansı işlər görəcəyim dəqiqləşəcək. Yeni baş məşqçinin təyinatı zamanı yəqin ki, mənim fikrim də əsas tutulacaq”.
Məlum qərardan sonra cavabsız qalan sual yeni baş məşqçinin kimliyi və milliyyətidi. “Sabah”ın siyasətini, yəni daha çox yerli məşqçi və futbolçulara etimad göstərdiyini nəzərə alsaq, vakant qalmış posta azərbaycanlı mütəxəssisin təyin olunacağı ağlabatandı. Lakin kim? Bu sualın cavabını yaxın günlərdə biləcəyik. Vaxtilə ölkəmizdə çalışmış əcnəbi məşqçilərdən birinin adını eşitsək, təəccüblənməyəcəyik.
HƏBİB
