Albaniya çempionatında 4-cü turun oyunları keçirilib. Eltun Turabovun formasını geydiyi “Biliş” də meydana çıxıb. Bu komanda doğma meydanda “Kukesi” ilə qarşılaşıb və qələbəyə sevinib – 2:1. Start heyətində meydana çıxan Turabov sonadək mübarizə aparıb. Ardıcıl ikinci qələbəsini qazanan “Biliş” 4 turdan sonra 7 xalla 10 komanda arasında 4-cü pillədə qərarlaşıb.
Moldova çempionatında 21-ci turun oyunları keçirilib. Nurlan Novruzovlu “Dinamo-Avto” səfərdə “Sfintul”la qarşılaşıb. Futbolçumuzun komandası bu oyundan məğlub ayrılıb (0:1). Nurlan start heyətində meydana çıxıb və sona qədər oynayıb. “Dinamo-Avto” 25 xalla 8 komanda arasında altıncıdı.
İspaniya sequndasında 5-ci turun oyunları çərçivəsində Eddi İsrafilovun şərəfini qoruduğu “Albasete” evdə “Tenerife”yə 0:4 yenilib. Eddi ehtiyatda qalıb. “Albasete” 6 xalla 22 iştirakçı arasında 15-ci yerdədi.
Almaniyanın 2-ci bundesliqasında 6-cı turun oyunları gerçəkləşib. Dmitri Nazarovlu “Ertsgebirge” doğma meydanda “Osnabrük”lə qarşılaşıb. Futbolçumuzun komandası bu oyundan qələbə ilə ayrılıb – 1:0. Nazarov start heyətində meydana çıxıb, 66-cı dəqiqədə əvəzlənib. 11 xala malik “Ertsgebirge” 18 kollektiv arasında 5-ci pillədə qərarlaşıb.
Qazaxıstan çempionatının 26-cı turunda Emil Balayevin formasını geyndiyi “Tobol” evdə “Okjetpes”I üstələyib - 1:0. Emil oyunu əvəzlənmədən keçirib. “Tobol” 55 xalla 1-ci pillədə qərarlaşıb.
Türkiyənin 1-ci liqasında 4-cü turun oyunları çərçivəsində Ufuk Budakın yeni transfer olunduğu “Altınordu” doğma meydanda “Əskişəhərspor”la qarşılaşıb. Ufukun komandası bu oyundan qələbə ilə ayrılıb – 4:1. Futbolçumuz qarşılaşmanı sonadək ehtiyat oyunçular skamyasından izləyib. “Altınordu” 4 xalla 18 iştirakçı arasında 9-cu yerdədi
Fərid Nəbiyevin “Slaviya”sı Çexiya gənclər liqasının 6-cı turunda evdə “Sokol Hostoun”u 4:0 hesabı ilə məğlub edib. Fərid start heyətində meydana çıxıb və 81-ci dəqiqədə əvəzlənib. Cari mövsümdə 3 qol vuran millimizin üzvü bu dəfə fərqlənə bilməyib. “Slaviya”nın U-21 komandası 6 turdan sonra 9 xalla 16 iştirakçı arasında 7-ci yerdədi.
Portuqaliya çempionatında 5-ci turun oyunları keçirilib. Renat Dadaşovlu “Pakuş de Ferreyra” səfərdə “Famalikao”ya uduzub – 2:4. Renatın adı bu görüşün iştirak ərizəsinə daxil edilməyib. “Pakuş de Ferreyra” 1 xalla 18 kollektiv arasında sonuncudu.
Almaniyanın 3-cü bundesliqasında 8-ci turun oyunları gerçəkləşib. Rüfət Dadaşovun formasını geydiyi “Proyssen” doğma meydanda Köln “Viktoriya”sı ilə üz-üzə gəlib - 2:3. Rüfət oyunu əvəzlənmədən keçirib. Komandasının ilk qolunu da 78-ci dəqiqədə o vurub. Münster klubu 8 xalla 20 komanda arasında 16-cı pillədə qərarlaşıb.
Ukrayna premier-liqasında 7-ci turun oyununda Pavel Paşayevli “Aleksandriya” doğma meydanda “Dnepr”lə münasibətləri aydınlaşdırıb. Futbolçumuzun komandası bu görüşdən qələbə ilə ayrılıb - 2:0. Paşayev meydanda yaşananları ehtiyat oyunçular skamyasından izləyib. “Aleksandriya” 12 xalla 12 kollektiv arasında üçüncüdü.
Avstriyanın 2-ci liqasında 7-ci turun oyunları keçirilib. U-21 yığmamızın üzvü Barış Əkinçiərin formasını geydiyi Klagenfurt “Austriya”sı evdə Lustenau “Austriya”sı ilə üz-üzə gəlib. Barış 3:3 hesabı ilə bitən oyuna 64-cü dəqiqədə qoşulub. “Austriya” 15 xalla 16 komanda arasında birincidi.