“Neftçi” çoxdan gözlənilən, uzun müddətdi müzakirələrə səbəb olan transferi rəsmiləşdirdi. Bəli, söhbət Vild-Donald Geryedən gedir. Halbuki paytaxt təmsilçisinin Mətbuat və İctimaiyyətlə əlaqələr Departamentinin rəhbəri Rüstəm Allahverdiyev bir neçə gün öncə qəzetimizə verdiyi açıqlamada bu variantı qətiyyətlə təkzib etmişdi. Dünən bakılılar haitili futbolçu ilə “1+1” il müddətinə müqavilə bağlayıblar. 30 yaşlı yarımmüdafiəçi komandanın heyətində “77” nömrəli formada meydana çıxacaq.
Qeyd edək ki, son klubu "Qarabağ” (2017-19) olan Vild-Donald Gerye Haitinin "Violett” (2009-11), "Amerika de Ke” (2011-13), Polşanın "Visla” (2013-16) və Türkiyənin "Alanyaspor” (2016-17) komandalarında çıxış edib. Azərbaycan çempionatının qalibi (2018, 2019) olan futbolçu Haiti yığmasının heyətində 44 oyun keçirib, 11 qolla yadda qalıb.
"Neftçi"dən söz düşmüşkən, komandanın braziliyalı yarımmüdafiəçisi Dario Frederiko yenidən ölkəmizi tərk edə bilər. Bu iddia ilə Cənubi Kipr mətbuatı çıxış edib. Həmkarlarımız “sambaçı”nın bu ölkənin klubunun maraq dairəsinə düşdüyünü yazıb. Hətta konkret klub adı da çəkilir. Belə ki, "Apollon" 28 yaşlı hücumameyilli futbolçunu heyətinə qatmaqda maraqlıdı. Xəbərdə Limassol klubunun Federiko üçün "Neftçi"yə sərfəli təklif göndərəcəyi qeyd olunub. Həmçinin o da vurğulanıb ki, "Neftçi" maddi cəhətdən yaxşı təklif alarsa, Cənubi Koreyadan yeni qayıdan və 2 illik müqavilə bağlayan Darionu satmağın əleyhinə olmayacaq. Cənubi Kiprdə "transfer pəncərəsi" bağlandığından, "Apollon" braziliyalını qış fasiləsində transfer etməyi düşünür.
Qeyd edək ki, ötən yay "Neftçi"yə keçən Dario Federiko bu ilin ilk 6 ayını "Daequ"da keçirdikdən sonra "ağ-qaralar"a qoşulub.