Fanklub bəyanat yaydı
“Neftçi”nin “Bney Yehuda” səddində ilişməsi fanatlarını bərk qəzəbləndirib. Haqları da var: onlar bu yay çox əziyyət çəkdilər. Moldovaya, Rusiyaya uzaq məsafə qət etdilər, hətta yollarda, hostel köşələrində qaldılar, sevimli komandalarına möhtəşəm dəstək verdilər. Amma İsraildə sərgilənən futbol onları özündən çıxardı. Komanda üzvləri sanki meydana könülsüz çıxmışdılar, xarakter nümayiş etdirmədilər. Bununla belə, “Forza Neftçi” yenə “Neftçi”nin yanındadı. Baxmayaraq ki, “feysbuk”dakı rəsmi səhifələri vasitəsilə yaydıqları bəyanatda baş məşqçidən tutmuş rəhbərliyə kimi hamını asıb-kəsiblər. Tələbləri çempionluqdu!
Bəyanatı olduğu kimi nəzərinizə çatdırırıq: “Bəstəmizdə də dediyimiz kimi, nə “Avropalar”, nə kuboklar bizə fərq etmir!
Önəmli olan komandada döyüşkən ruhun olması, futbolçuların geydikləri formanın, daşıdıqları loqonun haqqını verməsi, onlara layiq mübarizə aparması, döyüşməsidi. İsraildə biz bunun tam əksini, böyük bir biabırçılığı gördük. Biz sizdən qələbə gözləyəndə düşünməzdik ki, meydanda ayağınız əsəcək. Bordindən ağıllı oyun gözləyəndə düşünməzdik ki, ilk oyundakı səhvləri ikinci oyunda da təkrarlayacaq və rəqib qapısına bəxt hesabına yaxınlaşacaq. Belə oyunla, belə ruhla komanda Avropaya getməsə, yaxşıdı.
Çox futbolçunu günahlandıra bilərik, amma bu biabırçılığın əsas səbəbkarı, əlbəttə ki, klub rəhbərliyidi! Bir rəhbərlik ki, artıq neçənci dəfədi “komandanı oyuna yaxşı kökləyə bilməmişəm” sözünü deyən məşqçinin arxasında durursa, bu problemdi. Problemin səbəbkarı da siz özünüzsüz. Biz təəssüf ki, rəhbərlik tarixində belə oyunlar çox görmüşük. Amma indi oyun vaxtı deyil. Yeni mövsümdə həmişəki kimi komandamızın arxasında duracağıq, bizə bu barədə ağıl öyrətməyə, təsəlli və boş vədlər verməyə ehtiyac yoxdu, biz nə etdiyimizi bilirik. Mövsümə transfer etməməyiniz sizi bir az da çətinə salacaq, özünüz bilərsiz.
“Forza Neftçi” olaraq bəyan edirik ki, bu mövsüm bizi yalnız və yalnız çempionluq qane edəcək. İlk turlardan komandanın oyununda müsbətə doğru dəyişiklik olmazsa, bizi qarşınızda görəcəksiz! Məqsəd çempionluq olmayacaqsa, istefaya hazır olun!
Uduzandan sonra rəqib baş məşqçisinin üzərinə getmək lazım deyil, sinyor! Oyun göstərmək lazımdı, döyüşmək lazımdı, çempion olmaq lazımdı!”
Maraqlıdı ki, rəhbərlikdən, baş məşqçidən və elə futbolçulardan da narazılığını açıq şəkildə büruzə verən, onlara təzyiq göstərən fanklub öz üzvlərini “Sabah”la dünənki oyuna səsləmişdi: “Neftçi”dən nəticə tələb edən, Avroliqada bilet qırğını edənlərə şad xəbər: "Sabah"la oyunun biletlərini hələ də “Bakcell Arena”nın kassalarında tapmaq mümkündü”.
MİRAĞA hazırladı