Agentlər hücumçu üçün İspaniyanı uyğun variant sayırlar
Bu yay Mahir Əmrəli ətrafında o qədər söz-söhbət yayılıb ki, bilmirsən hansına inanasan. Bir müddət əvvəl “Qarabağ”ın forvardı ilə İspaniya sequndasında (birinci dəstə) çıxış edən “Malaqa” və “Ekstremadura”nın maraqlandığı xəbəri yayılmışdı. Dünən isə Əmrəlinin xidmətində “Genqam”ın maraqlı olduğu xəbəri yayıldı. Fransa mediasının yazdığı xəbərə inansaq, ötən mövsüm Liqa 1-də mübarizə aparan, sonuncu olduğuna görə elitanı tərk edən “Genqam” rəhbərliyi Mahirin transferinə görə bugünlərdə Bakıya gələrək, “köhlən atlar”ın rəhbərliyi ilə danışıqlar masası arxasına oturub. Son illər üçün ölkə futbolunun ən istedadlı yetirməsinin karyerasında inkişafa nail olmaq üçün legioner həyatı yaşamalı olduğunu dəfələrlə qeyd etmişik. Nəhayət, Mahir üçün əla fürsət yaranıb. İndi seçim 22 yaşlı futbolçunundu. Ancaq o, çoxsaylı təkliflər arasından ən sərfəlisini seçməlidi. Fransa və ya İspaniya? “Qarabağ”ın hücumçusunun hansı qərarı verəcəyi məlum deyil. Məsələ ilə bağlı üzdə olan agentlərin fikirlərini öyrənməyi lazım bildik.
Vaqif Heydərli: “Mahir bu gün Azərbaycan futbolunda üzdə olan bir-iki futbolçudan biridi. Artıq neçə ildi ki, o “Qarabağ”ın heyətində avrokuboklarda meydana çıxır. Bu üzdən onun Avropa klublarının maraq dairəsinə düşməsi anlaşılandı. Son vaxtlar ağdamlıların forvardının müxtəlif klubların maraq dairəsinə düşdüyü ilə bağlı xəbərlər yayılıb. Bunun özü artıq sevindirici haldı ki, azərbaycanlı oyunçu Avropa klublarının transfer siyahısındadı. İspaniya sequndasında çıxış edən “Ekstremadura” və “Malaqa”nın ona “elçi düşdüyü” bildirilir. “Ekstremadura”nın idman direktoru futbolçumuzun xidmətində maraqlı olduğunu açıqlayıb. İndi isə Fransanın birinci divizionunda çıxış edən “Genqam”ın rəhbərliyinin Mahirin transferi üçün Bakıya gəldiyi xəbəri yayıldı. Bu məlumatın nə dərəcədə doğru olduğunu deyə bilmərəm. Ancaq əsas odu ki, futbolçumuz dünya futbolunda dəbi müəyyənləşdirən ölkənin təmsilçisinin diqqət mərkəzinə düşüb. Bu artıq böyük uğurdu. Fransızların təklifinə gəlincə, klub prezidenti Əmrəlinin keçidi üçün Bakıya gəlibsə, deməli, fikirləri ciddidi. İndi əsas söz kluba məxsusdu. Mənim fikrimə gəlincə, Mahir İspaniyaya yollansa, daha yaxşı olar. Çünki onun oyun tərzi ispan futboluna daha yaxındı. Fransada daha çox gücə üstünlük verirlər. Mahir isə texnikalı oyunçudu”.
Səbuhi Səfiyarlı: “Bu gün Mahirin yanında yetərincə məsləhət verənlər var. Onlar da futbolu bilən adamlardı. Onun əcnəbi klubların maraq dairəsinə düşməsini nəinki “Qarabağ”ın, ümumiyyətlə, Azərbaycan futbolunun uğuru kimi qiymətləndirmək olar. Mahirə Türkiyədən təklif gəlsəydi, əminliklə deyə bilərdim ki, futbolçunun inkişafı yönündə bu addım o qədər də effektli sayıla bilməz. Qardaş ölkədə futbolun səviyyəsi hazırda o qədər də ürəkaçan deyil. Ancaq İspaniya və Fransa başqa səviyyədi. Fransanın nəinki birinci liqasında, hətta daha aşağı liqalarında çıxış edən futbolçular daim “böyük beşliy”in maraq dairəsində olur. Bununla bağlı bir çox nümunələr ortaya qoya bilərəm. Ancaq İspaniya çempionatı başqadı. La Liqa və sequndada çox istedadlı futbolçular çıxış edir. Fikrimcə, Mahirin oyun tərzi daha çox İspaniya futboluna yaxındı. Sequndadan gələn təklifi dəyərləndirsə, inkişaf baxımından daha çox irəli gedə bilər. İngiltərə və İspaniya təmsilçiləri arasında seçim etməli olsa, çox düşünmədən ona birinci varianta üstünlük verməyi məsləhət bilərdim Çünki Britaniyada daha sürətli və inkişafa faydalı olacaq oyun sərgilənir. Ancaq mətbuatda yazılanlara inansaq, “Qarabağ”ın forvardına Fransa ilə İspaniya klublarından real təklif var ki, bu iki ölkənin futbolu arasında böyük fərq yoxdu. Sadəcə, mənə görə Mahir İspaniyada özünü daha yaxşı tərəfdən göstərə bilər. Onsuz da bizim çempionatdan böyük klublara keçmək mümkünsüzdü. Etiraf edək ki, Azərbaycan premyer-liqasına “köhnə qitə”də maraq böyük deyil. Əmrəli aşağı dəstədə özünü yaxşı tərəfdən göstərə bilsə, futbolçu kimi daha iddialı klublarda çıxış edə bilər”.
Erkin İbrahimov: “Azərbaycanlı futbolçunun Avropanın aparıcı çempionatıarında çıxış edən klubun maraq dairəsinə düşməsi artıq uğurdu. Mahirə görə şəxsən mənimlə bir çox agent əlaqə saxlayıb. Futbolçunun xarakteri, futboldankənar həyatı ilə maraqlananlar çox olub. Gəlin etiraf edək ki, Avropada belə bu yaşda Çempionlar Liqasında çıxış edən komandanın əsas heyət üzvü olmaq heç də asan məsələ deyil. Əmrəlinin əsas üstünlüyü belə təcrübəyə malik olmasıdı. Onu da bilirəm ki, İspaniya ilə yanaşı, Fransadan da Mahirə real təklif gəlib. Əslində hər iki çempionatın səviyyəsi eynidi. İstər sequnda, istərsə də Fransanın birinci liqası olsun, hər ikisində oynamaq asan deyil. Sadəcə, burda bir məsələ var ki, hansı klub futbolçumuzun xiddmətində daha çox maraqlıdı. “Genqam”ın prezidenti o boyda yolu qət edib, Mahirin keçidini həll etmək üçün Azərbaycana gəlibsə, deməli, Fransa təmsilçisi onun transferində daha çox maraqlıdı. Düzdü, “Ekstremadura”nın idman direktoru İspaniya mətbuatına futbolçumuzla maraqlandığını açıqlayıb. Lakin “Genqam”ın prezidenti danışıqlar üçün Bakıya səfər etməyi lazım bilibsə, fikrimcə, bu təklifi dəyərləndirmək lazımdı”.
RƏŞAD