“Tədricən hər şeyi öyrənəcəksiz”
"Qarabağ"ın hüçumçusu Mahir Əmrəli komandasının "Keşlə" üzərində 1:0 hesablı qələbəsindən sonra jurnalistlərin əhatəsinə düşüb. Gənc futbolçu son günlər gündəmdə olan suallara aydınlıq gətirib. Mahir söhbətə oyunu dəyərləndirməklə başlayıb.
- Mövsümün ilk oyunu idi. İlk 15 dəqiqədə futbolçular açılışmamışdılar. Sonra qol epizodları sıralanmağa başladı. Rəqibin də təhlükəli vəziyyətləri oldu. Maraqlı qarşılaşma alındı. Qol imkanlarının yalnız birindən istifadə edə bildik.
- APOEL-dən aldığınız yenilgi komandaya necə təsir edib?
- Qurban Qurbanov komandanı bir az motivasiya etdi. Bizim işimiz hər dəfə yeni oyunlara hazırlaşmaqdan ibarətdi. Bu üzdən nə sevinməyə, nə də üzülməyə vaxt olur. Baş məşqçi də bunu nəzərə çatdırırdı. Bu gün toparlanıb qalib gəldik.
- “Keşlə” üzərində qələbə komandanı ayıldacaq?
- Bu gün “Keşlə” haqda düşünürdük. “Keşlə” yox, Avroliqada çıxış edən klub da olsaydı, bildiyimiz kimi hazırlıq keçəcəkdik. Artıq bu matçı unudub, növbəti qarşılaşmaya hazırlaşmalıyıq.
- APOEL-i niyə keçə bilmədiz? Səncə, komandaya nə mane oldu?
- Sadəcə, bizim günümüz deyildi. Rəqibin çox qol epizodu olmadı. Üstün tərəf biz idik. Amma bəxtimiz gətirmədi.
- İspaniya komandalarından sonra Fransa “Genqam”ının səninlə maraqlandığı iddia olunur. Bu transferi düşünürsən?
- Hələ ki təklif barədə heç kimə demək istəmirəm. Qarşıda oyunlar var. Tədricən hər şeyi öyrənəcəksiz.
- Qurban Qurbanov “get” desə, Liqa 2-də oynayarsan?
- Fransa və İspaniyanın ikinci liqasının bizim çempionatdan güclü olduğunu düşünürəm. Lakin burda Avropa Liqası və Çempionlar Liqasında oynayırıq. Bu məqamı da nəzərə almaq lazımdı. Yenə də məsləhətləşəcəm. Ora gedib, qalmaq düşüncəsi olmamalıdı. Daha da irəli gedə biləcəyəmsə, niyə də olmasın?!
- “Genqam” rəsmiləri səninlə görüşüb?
- Yox.
- Avropa Liqasının pley-offunda “Linfild”lə qarşılaşacaqsız. Çoxları düşünür ki, “Qarabağ” mərhələni keçib. APOEL ilə qarşılaşma ərəfəsində də belə fikirlər var idi. Bu sizdə arxayınlıq yaratmır?
- Biz elə hiss etmirik. Azarkeşlər inanırsa, bu, dəstək olmaq deməkdi. Fanatların dəstəyi olandan sonra qələbə qazanmağa çalışacağıq.
- Şimali İrlandiya təmsilçisini adlamaq mümkündü?
- Müasir futbol elədi ki, istənilən rəqibi adlamaq olar. “Ayaks” ötən mövsümün yarımfinalçısı olsa da, PAOK-la səfərdə 2:2 hesablı heç-heçə etdi. Bu, mənə görə sensasiyalı nəticədi. Müasir futbolda hər şey mümkündü.
