“Qarabağ” ÇL-in pley-offunda uduzsa, 5 milyon avro qazanacaq
Azərbaycanlı futbolsevərlərin duaları “Qarabağ”la “Neftçi”dən yanadı. Ölkənin iki nəhəng klubu qitəmiqyaslı turnirlərin qrupuna bu qədər yaxınkən dua da etməliyik, alqış da! Amma iqtisadi dayaqları olmayan, pula söykənməyən hər bir təşəbbüs məhvə məhkumdu. Bəs UEFA bayrağı altında keçirilən turnirlərin iştirakçılarına nə paylayır, daha doğrusu, nə qədər paylayır?
Qitə futbol qurumu artıq Çempionlar Liqası ilə Avropa Liqasının yeni mövsümü üçün iştirakçılara ayıracağı mükafat fondunun məbləğini açıqlayıb. ÇL, AL və UEFA Superkuboki qitə futbol qurumuna ümumilikdə 3,25 milyard avro qazandıracaq. Bu məbləğdən yarışların təşkili ilə bağlı xərclərə 295 milyon, Həmrəylik proqramları üzrə ödənişlərə isə 227,5 milyon avro gedəcək. Yerdə qalan 2,73 milyardın 6,5 faizi UEFA-nın ehtiyat fondunda qalacaqsa, 93,5 faizi bu turnirlərə qatılan klublar arasında bölünəcək.
Proqnozlaşdırılan gəlir və ödənişlər sxeminə əsaslansaq, 2019/20 avrokubok mövsümünün iştirakçılarına toplam 2,55 milyard avro çatacaq. Bunun 2,04 milyardı Çempionlar Liqasının və UEFA Superkuboku uğrunda matçın iştirakçıları, 510 milyon avro isə Avroliqa klubları üçün nəzərdə tutulub.
Qrupun biraddımlığında. “Qarabağ” bu mərhələyə çox yaxındı deyə, indi hər kəsi düşündürən suallardan biri də odu ki, Çempionlar Liqasının pley-offunun iştirakçıları nə qədər qazanacaq? Pley-off mərhələsinin iştirakçıları arasında 30 milyon avro bölünəcək. Burda uduzan hər kluba 5 milyon çatacaq. Qaliblər üçün ödəniş nəzərdə tutulmayıb, amma onlar əvəzində ÇL-in qrupuna düşməyə görə əlavə para qazanacaq.
Qrupdan finala qədər. ÇL-in qrupuna düşənlər UEFA-dan nə alacaq? Qrup mərhələsindən finala qədər nəzərdə tutulan ödənişlərin ümumi məbləği 1,95 milyard avrodu. Klublar üçün ödənişlər dörd kateqoriyaya ayrılır:
* 25 faiz – ilkin ödəniş (488 milyon)
* 30 faiz – nəticəyə görə ödəniş (585 milyon)
* 30 faiz – komandanın son 10 ildəki çıxışına əsasən nəzərdə tutulan ödəniş (585 milyon)
* 15 faiz – marketinq şəbəkəsindəki paya görə ödəniş (292 milyon).
ÇL-in qrupuna düşən 32 klubun hər biri 15,25 milyon avro qazanır (14,5 milyon ilkin, 750 min əlavə ödəniş kimi). Nəticələrə görə nəzərdə tutulan 585 milyonun bölgüsünə gəlincə, ÇL-in qrupundakı hər qələbə komandaya 2,7 milyon, heç-heçə isə 0,9 milyon avro qazandırır. İstifadə olunmayan vəsait (hər heç-heçədə 0,9 milyon artıq qalır) toplanır və sonradan qrup mərhələsinin iştirakçıları arasında qələbə sayına görə proporsional qaydada bölünür. Təbii ki, məğlubiyyətə görə ödəniş nəzərdə tutulmur.
ÇL-də qrupdan çıxmaq daha da zənginləşmək deməkdi:
* 1/8 finala vəsiqəyə görə klublar 9,5 milyon avro qazanır.
* 1/4 finala vəsiqəyə görə klublar 10,5 milyon avro qazanır.
* 1/4 finala vəsiqəyə görə klublar 10,5 milyon avro qazanır.
* yarımfinala vəsiqəyə görə klublar 12 milyon avro qazanır.
* nəhayət, finalda uduzana 15, qalibə isə 19 milyon avro çatır.
* UEFA Superkuboku uğrunda oyunun hər iştirakçısı 3,5 milyon, qalib əlavə 1 milyon avro qazanır.
Klub reytinqinə əsasən nəzərdə tutulan ödəniş (585 milyon avro)
Ötən mövsümdən tətbiq olunan yeni reytinq son 10 ildəki çıxışa əsaslanır. Bu dövrdə yığılan balla yanaşı, qitəmiqyaslı turnirləri qazanmağa görə də əlavə bonus verilir. 585 milyon “əmsal payına” görə qruplaşdırılıb. Hər pay 1,108 milyona bərabərdi. Məsələn, reytinqdə ən aşağı yerdə qərarlaşan kluba bir pay, yəni göstərilən məbləğ çatacaq. Növbəti yerdə qərarlaşan iki pay və beləcə zəncir davam edəcək. Ən yüksək reytinqə malik klub 32 pay, yəni 35,46 milyon avro alacaq.
Marketinqdən gələn pul (292 milyon avro)
Bu məbləğ ÇL iştirakçılarının təmsil etdikləri telebazarın çəkisinə görə bölünəcək, sonra isə hər milli assosiasiyanın klubları arasında paylaşdırılacaq.
Qəzetimizin növbəti sayında Avropa Liqasında pulun bölgüsü ilə bağlı müvafiq informasiyanı təqdim edəcəyik.