...və əlahiddə təhlükəsizlik tədbirləri ilə üzləşib
Dünənki püşk azərbaycanlı azarkeşlərin bu il Bakıda Çempionlar Liqasının qrup oyunlarının həyəcanını yaşamaqla bağlı ümidlərini hər nə qədər sarsıtsa da, sirr deyil ki, “Qarabağ” Kiprə məhz qrupun yolunu qısaltmaq üçün gedib. Bunun üçün əvvəlcə vətənə sərfəli nəticə ilə dönmək, sonra da “Bəhramov”un dolu tribunaları önündə Kipr yunanlarının işini bitirmək lazımdı. Təbii ki, futbol mənasında.
...Beləliklə, bazar günü 17.30 radələrində yola çıxan “Qarabağ” təxminən üçsaatlıq uçuşdan sonra Larnakaya çatıb. Əslində Kiprin paytaxtı Nikosiyada da hava limanı var, sadəcə, ora hərbi təyinatlı təyyarələr üçün nəzərdə tutulub. Larnakaya enən “köhlən atlar” 40 dəqiqəlik avtobus yolçuluğunun ardından Nikosiyaya çatıblar. Zədəlilər – Bədavi Hüseynov və Filip Ozobiç istisna olmaqla qalan futbolçular düşərgədədi. “Qarabağ”ın mətbuat katibi Nurlan İbrahimovdan aldığımız bilgiyə görə, komanda üçün əlahiddə təhlükəsizlik tədbirləri görülüb, otelə polis maşınının müşayiəti ilə gediblər, polis maşını və mülki geyimli polislər gecəboyu otelin həyətində keşik çəkib. Yeri gəlmişkən, “Qarabağ” elə “Neftçi”nin 2012-də qaldığı oteli seçib. Sadəcə, indi otelin adını dəyişib, “Landmark” qoyublar. 1967-ci ildə tikilən otelin yeni sahibləri bu il iyunun 1-dən “Hilton” adından imtina ediblər. Nurlan bəyin dediyinə görə, indiyə qədər 30-40 azarkeş “Qarabağ”ı dəstəkləmək niyyəti ilə kluba müraciət etsə də, bu yöndə planlara oyun günü aydınlıq gələcək.
Demək olar ki, hər il eyni ənənə təkrarlanır: avrokuboklarda komandalarımızın rəqibləri bilinin kimi azarkeşlər rəqib düşərgəyə sosial şəbəkələr vasitəsi ilə atmacalar, təhqirlər ünvanlayırlar. APOEL də istisna deyil. Və Cənubi Kipr klubu çıxış yolunu "feysbuk"da Azərbaycanı "qara siyahı"ya salmaqda görüb. Son günlər azərbaycanlı azarkeşlər Nikosiya klubunun rəsmi səhifəsinə hücum ediblər. Azarkeşlər APOEL-i və kiprli fanatları ən ağır şəkildə təhqir edib, bayağı rəylər yazıb. Başqa əlac görməyən APOEL-in media xidməti rəsmi səhifəyə Azərbaycandan girişə qadağa qoyub. Yadınızdadısa, "Seltik” də vaxtilə eyni praktikaya əl atmışdı. Qlazqo təmsilçisi bu yaxınlarda Azərbaycana olan qadağanı qaldırıb. Çexiyanın "Viktoriya" klubu isə hələ də ölkəmizi "blok"da saxlamağı lazım bilir. UEFA Avropa Liqasının rəsmi səhifəsinə də iki il Azərbaycandan giriş mümkün olmamışdı. Qitə futbol qurumu 2016-nın iyulunda bu məhdudiyyəti aradan qaldırmışdı.
Bu arada türkiyəli fizioterapevt Murat Şahinoğlu yenidən “Qarabağ”a qayıdıb. O, Ağdam klubunda fəaliyyətini bərpa edib. Şahinoğlu uzun illər “Qarabağ”da çalışdıqdan sonra vətəni Türkiyəyə qayıtmışdı. Bundan sonra o, Türkiyənin əsas yığmasında və “Beşiktaş”da işləyib. “Qarabağ”a qayıdana qədər ölkəsinin U-19 millisində fizioterapevt idi.
ORXAN