“Yenidən oyun təcrübəsindən məhrum olsa, formadan düşəcəyindən ehtiyatlanıram”
Son günlər “Səbail”in şərəfini qoruyan Ağabala Ramazanova Rumıniyadan transfer təklifi gəldiyi haqda xəbərlər dolaşır. Söylənilənlərə inansaq, “dənizçilər”in Avropa Liqasının birinci təsnifat mərhələsində üz-üzə gəldiyi və Ağabalanın iki oyunda qapısından 3 top keçirdiyi “Universitatya Krayova” rəhbərliyi onun xidmətində maraqlıdı. Məsələ ilə bağlı mətbuata açıqlama verən futbolçunun qardaşı Zaur Ramazanov deyilənləri təsdiqləyib və onu da əlavə edib ki, Rumıniya klubunun fikri ciddi olub. Ancaq o qardaşına bir mövsüm də Azərbaycanda çıxış etdikdən sonra legioner həyatı yaşamağı məsləhət görüb.
Ağabalaya yaxın şəxsdən əldə etdiyimiz bilgiyə görə, vingerin özünün rumınların onunla maraqlanmasından xəbəri yoxdu. Bu məsələdə vasitəçilik edən agentlərdən biri birbaşa Zaurla əlaqə saxlayıb və Krayova təmsilçisinin qardaşının xidmətində maraqlı olduğunu onun diqqətinə çatdırıb. Söylənilənlərə aydınlıq gətirmək üçün dünən veteran futbolçu, eyni zamanda Ağabalanın agenti olan böyük qardaşla əlaqə saxladıq. Millinin sabiq forvardı deyilənləri təsdiqlədi: “Bugünlərdə Rumıniya klubu ilə isti münasibəti olan, dəfələrlə onlara futbolçu təklif edən agentlərdən biri mənimlə əlaqə saxladı və “Universitatya”nın Ağabalanı heyətində görmək istədiyini bildirdi. Onu da əlavə etdi ki, bu klub yeni mövsümdə qarşısına çempionluq hədəfi qoyub və məqsədə çatmaq üçün heyəti gücləndirmək niyyətindədi. “Universitatya” bir futbolçusunu Almaniya klublarından birinə satıb. Deyəsən, almanlardan yaxşı pul alıblar və boş qalan mövqeyə iki oyunçu dəvət etmək istəyirlər ki, onlardan biri də Ağabaladı. Düşünmək üçün vaxt istədim. Və sonda belə qərara gəldik ki, qardaşım daha bir mövsüm premyer-liqada oynasın, daha yaxşı forma yığdıqdan sonra ölkə xaricinə yollansın. Açığı, indi inanmıram ki, gedən kimi əsas heyət üzvünə çevrilsin. Ehtiyatda qalmaq isə hazırda ona lazım deyil. İndi-indi özünə gəlib, yaxşı mənada oyununu tapıb. Bu arada yenidən oyun təcrübəsindən məhrum olsa, formadan düşəcəyindən ehtiyatlanıram. İndi sizə dediklərimi agentə də söylədim. O məni çox gözəl başa düşdü. Hər şey yaxşı getsə, ola bilsin, qış fasiləsində Ağabala ölkə xaricinə yollandı”.
RƏŞAD