Mirsahib Abbasov da “Səbail”də
Bolqarıstan toplanışındakı yoldaşlıq görüşlərində qələbə üzünə həsrət qalan “Səbail”in Avroliqada nə ilə yadda qalacağı maraqla gözlənilir. Avrokuboklarda debüt edən bayıllıların heyətində bir neçə yeni futbolçu var ki, onların komandaya nə dərəcədə uyğunlaşdıqlarını zaman göstərəcək. Bir sözlə, Aftandil Hacıyev həm qayğılı, həm də həyəcanlıdı.
Kamal Bayramovun sıradan çıxması durumu bir az da çətinləşdirib. Yay fasiləsində “Zirə”ni “Səbail”ə dəyişən təcrübəli qolkiperin aldığı zədə yetərincə ciddidi. Kamalın təxminən dörd həftə məşqlərdən kənarda qalacağı gözlənilir. Bu isə o deməkdi ki, “Universitatya” ilə qarşılaşmalarda meydana çıxa bilməyəcək. Hətta komandası növbəti mərhələyə yüksəlsə belə, Bayramov oyunları kənardan izləyəcək. Qeyd edək ki, digər qapıçı Aleksandr Rıbka da uzun müddətə sıradan çıxıb. Yaxşı ki, Daniel Bojinovski var.
“Səbail” demişkən, komandadakı Abbasovların sayı artmaq üzrədi. Ürfan Abbasovla Mirabdulla Abbasova Mirsahib Abbasov da qoşulacaq. “Dənizçilər”ə qoşulan cinah yarımmüdafiəçisi ilə müqavilə bağlanacağı gözlənilir. Bilməyənlər üçün xatırladaq ki, “İnter”in yetirməsi olan və son mövsümü “Zirə”də keçirən Mirsahib Mirabdullanın böyük qardaşıdı.
HƏBİB