Federiko isə qayıdır
İyunun 10-dan təlim-məşq toplanışına start verən "Neftçi" heyətlə bağlı çalışmaları da davam etdirir. Daha öncə "ağ-qaralar" Məhəmməd Mirzəbəyov, Petru Raku, Qoran Paratski və Ruslan Abışovla vidalaşmışdı. Gedənlərin siyahısına daha bir ad əlavə olunub. Qışda paytaxt təmsilçisi ilə anlaşan Canluka Sansone ilə müqaviləyə qarşılıqlı razılıq əsasında xitam verilib. Qeyd edək ki, Sansone "Neftçi"nin heyətində 11 oyunda meydanda oldu. Ümumilikdə 655 dəqiqə mübarizə aparan italiyalı hücumçu iki dəfə rəqib qapılarına yol tapdı. Halbuki ondan gözləntilər daha böyük idi. Beləliklə, "ağ-qaralar" Canluka ilə vidalaşmağı məqsəuyğun saydı.
Əslində Mirabdulla Abbasovun getmək fikrinə düşməsinin səbəblərindən biri də hücumda yaranan sıxlıqla bağlı idi. Onun fikrindən daşınıb-daşınmayacağını zaman göstərəcək. Bununla belə, irəli xətdə rəqabət yenə də böyük olacaq. Klub artıq Rauf Əliyevin transferini açıqlayıb. Bundan başqa, Stiven Jozef-Monrozla da, demək olar, razılıq əldə olunub. Sadəcə, rəsmi müqavilənin imzalanması qalıb. Bu yubanmanın səbəbini isə hərə bir yana yozur. Bəziləri düşünür ki, Jozef-Monroz hələ də maaşını qaldıracağına ümid edir. Başqa bir variant isə Stivenin daha çox dincəlmək niyyəti ilə bağlıdı. Anlaşmanı imzalasa, düşərgəyə gəlib hazırlığa qoşulmalıdı. Jozef-Monroz isə hələ ki sərbəst futbolçu kimi istirahətini maksimum uzatmağa çalışır. Təbii, bunlar gəzən söz-söhbətdi. Lakin realdısa, "Neftçi"nin əleyhinə işləyir.
Sonda isə "ağ-qaralar"ın daha bir futbolçu ilə ortaq məxrəcə gəldiyini qeyd edək. Söhbət Dario Federikodan gedir. Braziliyalı futbolçu üçün flaqman yad klub deyil. O, məhz bu qış fasiləsində "Neftçi"dən ayrılmışdı. Bu ayrılıq isə nə Dario, nə də klub üçün xeyirli oldu. Ola bilər, hər iki tərəf pul qazandı. Ancaq futbolçu Cənubi Koreyada xoşbəxt olmadısa, "ağ-qaralar"ın çempion ola bilməməsinin səbəblərindən biri də qorxulu hücum "üçlüy"ünün (Baqali - Mirabdulla - Dario) pozulmasıdı. Bizə çatan informasiyaya görə, Federiko artıq Bakıdadı. Bugünlərdə "Neftçi"nin onunla anlaşmanı da açıqlayacağı gözlənilir.
FARİZ