“Bu nəticə ilə böyük şok keçirdim”
Matç başa çatandan sonra ənənəvi olaraq baş məşqçilərin iştirakı ilə mətbuat konfransı keçirildi. Əvvəlcə media nümayəndələri qarşısına qonaqların baş məşqçisi Pavel Hapal çıxdı. 50 yaşlı mütəxəssis özünü nə qədər təvazökar aparmaq istəsə də, komandasının böyükhesablı qələbəsindən məmnun qaldığını istər-istəməz büruzə verirdi. Slovakların çalışdırıcısı sualları cavablamamış oyunla bağlı fikirlərini bölüşdü.
- Qol buraxmağımıza baxmayaraq, kifayət qədər şansımız oldu. Matçı 5 qolla tamamladıq. Ümumilikdə hər şeydən razı qaldım.
- Bu qədər zəif Azərbaycan yığması gözləyirdiz?
- Deməzdim ki, zəif komandaya qarşı oynadıq. Sadəcə, bizim performansımız çox yüksək idi. Rəqibə istədiyini etməyə imkanı vermədik. İordaniya ilə yoldaşlıq görüşündə də əsas oyunçulara istirahət vermişdik. Onlar bundan səmərəli yararlandılar.
- Robert Bojenikin hücumdakı çıxışından məmnun qaldız? Və Marek Hamşikin bu gün 2 qol vuraraq yığmada bombardirliyi ələ keçirməsi barədə nə deyə bilərsiz?
- Bojenikin hücum xəttində oynaması ideyası 2 gün əvvəl yaranmışdı. İki seçimimiz var idi. Biri o, digəri isə Duda idi. Biz bu gün Bojenikə üstünlük verdik. Hamşikə gəlincə, ona görə çox sevinirəm.
- Final mərhələsində qrupun 3 və 1/4 final mərhələsinin 1 oyunu Bakıda keçiriləcək. Slovakiyanın qrupdan çıxacağı real görünür. Final mərhələsinin oyunlarını paytaxtımızda keçirmək istərdiz?
- Əlbəttə. Qazanılan 3 xalla yanaşı, vurulan və buraxılan qollar da sonda rol oynaya bilər. Gəlmək istərdim. Bakı gözəl şəhərdi və böyük stadionu var. Bakı Olimpiya Stadionu kimi gözəl arenada oynamaq istərdik.
Qonaqların baş məşqçisinin ardından jurnalistlər qarşısına Nikola Yurçeviç çıxdı. Çoxları gözləyirdi ki, komandasının biabırçı çıxışdan sonra baş məşqçi əvvəlcə Azərbaycan xalqından üzr istəyəcək. Ancaq xorvat mütəxəssis heç nə olmayıbmış kimi, əvvəlcə oyunla bağlı fikirlərini bölüşdü.
- Bu hesabdan sonra nəsə demək çətindi. Slovakiyanı təbrik edirəm. Çox yaxşı oynadılar. Oyuna yaxşı başladıq, bəzi anlarda topa sahib olduq, kombinasiyalı hücumlar qurmağa çalışdıq. Lakin rəqibin ilk həmləsində qol buraxdıq. Ramil Şeydayevin fərqlənməsindən sonra geridönüşə ümid yarandı. Araz Abdullayevin qol vurmaq imkanı oldu. Hesab 1:4 olduqda isə oyun bitdi. Rəqibin heyətində Lobotkanın transfer qiyməti 25 milyon avrodu. Bizim bütün futbolçuların ümumi qiyməti bu qədər deyil.
- Əvəzetmələrdə gecikdiyinizi düşünmürsüz?
- 1:5 hesabından sonra belə məsələləri müzakirə edə bilərik. 55-60-cı dəqiqələrdən sonra dəyişiklik etməyi düşünürdüm.
- Bu gün meydanda yalnız Ramil Şeydayev mübarizə apardı. Millinin heyətində cəmi bir futbolçu sarı vərəqə alırsa, orda hansı mübarizədən söhbət gedə bilər?
- Bu fikirlə razı deyiləm. 4-cü qola qədər şanslar var idi. 60-cı dəqiqədən sonra fiziki və psixoloji cəhətdən rəqiblə oynamaq çətin idi.
- 5-ci qolda hansı hissləri keçirdiz və buna görə azarkeşlərdən üzr istəmək fikriniz var?
- Əlbəttə. 85-ci dəqiqədə 5-ci topu buraxdıq. Bu, mənim və komandam üçün böyük şok idi. Belə məğlubiyyətə görə azarkeşlərdən üzr istəyirəm.
- Slovakiyada bir futbolçunun qiymətinin 25 milyon avro olduğunu dediz. Yəqin ki, üç gün əvvəl keçirilən Türkiyə - Fransa matçının nəticəsindən xəbəriniz var. Türklərin qalib gəldiyi oyunda məğlub komandanın şərəfini qoruyan Mbappenin transfer qiyməti Türkiyə yığmasında çıxış edən bütün futbolçuların transfer dəyərindən çoxdu. Meydanda nə avro, nə də dollar mübarizə aparır. Bu gün futbol olmadı. Azərbaycan yığması sonuncu dəfə öz meydanında 2007-ci ildə Serbiyaya böyük hesabla uduzmuşdu. 12 ildən sonra bizə eyni məyusluğu yaşatdığınıza görə xəcalət çəkirsiz?
- Bəli, utandırıcı nəticədi. Lobotkanın qiymətini, sadəcə, bir fakt kimi qeyd etdim. Slovakiyanın oyunçuları Avropanın aparıcı klublarında çıxış edir. Onlara qalib gəlmək üçün xüsusi günlərdən biri olmalıydı. Millətlər Liqasında Azərbaycan futbolunun ən böyük məşqçisi belə Malta önündə çətinlik çəkmişdi. Qrupdakı rəqiblərimiz bizdən qat-qat güclüdülər. Əlimizdən gələni etməliyik ki, onlara qarşı mübarizə apara bilək.
- Məşqçi yox, bir azarkeş kimi yığmanın oyununu necə şərh edərdiz və evdə bu hesabla uduzduqsa, belə çıxır ki, bizi səfər matçlarında bundan da ağır məğlubiyyətlər gözləyir?
- Bu nəticə ilə böyük şok keçirdim. Hər kəsi başa düşürəm. Futbolda böyük rəqiblərə qarşı oynadıqda yaxşı nəticə qazanmaq üçün xüsusi gün olmalıdı. Futbol situasiyalı oyundu. Sağa və ya sola doğru verilən bir qərar nəticəni dəyişə bilir. Bəzi kiçik nüanslar oyunun taleyinə təsir edə bilir.
- Xorvatiyaya 1:2, Macarıstana 1:3, Slovakiyaya isə 1:5 hesabı ilə uduzduq. Hərçənd bu dəfə məntiqi ardıcıllıq pozuldu. Növbəti görüşdə 1:6 hesabı ola bilərmi?
- Növbəti oyunda daha yaxşı olacağımıza və böyükhesablı məğlubiyyətlə üzləşməyəcəyimizə inanıram.
- İndiyə qədər bura gələn əcnəbi məşqçilər bir neçə ildən sonra daha uğurlu nəticələrin olacağını deyib. 3 oyunda 10 top buraxan milli komandanın yaxşı olması üçün nə qədər vaxta ehtiyacı var?
- Bugünkü məğlubiyyətdən sonra bu suala cavab vermək çətindi. Bu gün uğursuz nəticə oldu. Amma inanıram ki, komandamız daha yaxşı çıxış edə bilər. İndi geniş təhlilə dəyməz.
RƏŞAD
