Millinin Slovakiya ilə oyununda hesabın böyüklüyü hakimliyi arxa plana keçirir. Tərəflərdən birinin digərini əzdiyi, yəni 1:5 hesabı qeydə alınan matçda idarəçilik haqda fikirlər formal məzmun daşıyır. İnsafən, Şotlandiyadan olan hakimlər briqadası hansısa ciddi səhvlə də diqqəti çəkmədi. Referi Con Biton mülayim hakim kimi yadda qaldı. O çalışırdı ki, futbolçularla münasibətləri pozmasın, sərt üzünü göstərmirdi. Ağabala Ramazanov, Qara Qarayev, Ramil Şeydayev və Bədavi Hüseynovun onlara qarşı kobudluq edildiyini bildirmələrini təbəssümlə qarşıladı. Ramazanov kimi aqressiv biri hətta hakimin bu jestinin qarşılığında “canın sağ olsun” mənasında əlini onun kürəyinə toxundurdu. Biton cəmi bir dəfə əlini cibinə atdı. O, 70-ci dəqiqədə Anton Krivotsyuka sarı vərəqə göstərdi. Bəlkə həmin qayda pozuntusuna da göz yummaq, daha doğrusu, vərəqəsiz ötüşmək olardı. Ancaq Krivotsyuk cəmi bir neçə dəqiqə əvvəl də diqqət mərkəzinə düşmüş, hakim şifahi xəbərdarlıqla kifayətlənmişdi. Şotlandiyalı referi müdafiəçimizə “sarı” göstərərkən məhz buna işarə edərək qayda pozuntusunun sistematik baş verdiyini diqqətə çatdırdı.
Con Biton yalnız bir epizodda şübhəli qərarla yadda qaldı. Daha doğrusu, o, 68-ci dəqiqədə cərimə meydançasında Bədavi Hüseynova qarşı kobudluğa yol verən Robert Bojenikin davranışına göz yumdu. Slovakiyalı hücumçu Bədavini arxadan itələyərək yerə sərdi və komanda yoldaşı Peter Pekarik üçün yaxın dirəyi boşaltdı. Nəticədə hücum davam etdirildi, qol olsaydı, Bitonun günahı ağır olacaqdı. Ümumiyyətlə, şotlandiyalı ideala yaxın idarəçiliklə yadda qaldı.
Elə veteran hakimlərimizdən olan Tahir Süleymanov da Con Bitonun işində qüsur görməyib. Bir sözlə, bizim kimi o da məğlubiyyətə don geydərməyin tərəfdarı deyil: “Belə baxanda, hakimliyə ehtiyac olmayan oyun idi. Oyun bir tərəfin diqtəsi altında keçdi. Belə görüşlərdə hakimlər, adətən, çətinlik çəkmir. Sürət olmadığı üçün idarəçilik asan idi. Con Biton futbolçulara sərt mübarizə aparmağa imkan verirdi. Şotlandiyalı referi oyuna tam nəzarət edirdi. Görüşü, demək olar ki, səhvsiz idarə etdi. Kiçik metodiki səhvlər var idi. Ancaq çətin ki, həmin qüsurlar Bitonun qiymətinə təsir etsin. Yəqin hakim-inspektoru oyunun ağırlıq dərəcəsini də nəzərə alacaq. İstənilən halda, Şotlandiyadan olan hakimlər briqadasının yüksək qiymət alacağı şübhə doğurmur”.
MİRAĞA
