Slovakiya mətbuatı biz(imkilər)dən yazır
Azərbaycan - Slovakiya qarşılaşmasını işıqlandırmaq üçün bu ölkədən Bakıya xeyli sayda həmkarımız təşrif buyurmuşdu. Oyundan əvvəl nə qədər sakit görünsələr də, 90 dəqiqənin tamamında bir o qədər sevincli idilər.
Bir neçə Slovakiya saytı oyunda baş verən önəmli anları fotosessiya, ya da videogörüntü şəklində oxucularına çatdırıb. Təbii ki, müəyyən bilgilərə də rast gəlmək mümkündü. Slovakiya mətbuatında dərc olunan və bizim üçün maraqlı ola biləcək hissələri diqqətinizə çatdırırıq.
Sport.sk: “Azərbaycanlılar üçün qorxulu gecə. Matçdan əvvəl yerlilərdən kiməsə qonaqların 5 top vuracağını desəydin, inanmazdılar. Şənbə günü Macarıstandan alınan yenilgi azərilərə pis təsir etsə də, yığmalarının ikinci dəfə, həm də böyük hesabla uduzacağını gözləmirdilər. Lakin oyunun ilk hissəsi Slovakiyanın hansı gücə sahib olduğunu açıq-aşkar ortaya qoydu. Hesabın açılması və 4 dəqiqəyə sığan 3 qol oyundakı gərginliyi artırsa da, Marek Hamşikin dublu məsələyə nöqtə qoydu. Hantskonun baxımlı ötürmədən vurduğu qol isə gecənin nöqtəsiydi. Futbol Tanırısı slovakların yanında olsaydı, yekun hesab 1:7, hətta 1:8 də ola bilərdi. Belə baxanda bu da pis deyil. Bundan sonra davamını gətirmək lazımdı”.
Futbalsfz.sk: “Möhtəşəm oyun, layiqli qələbə və tablodakı 1:5. Matçdan bir gün əvvəlki mətubat konfransında Pavel Hapalla Marek Hamşik qələbə istəklərini gizlətməsələr də, olduqca ehtiyatlı davranmışdılar. Sanki məğlubiyyəti göz önünə alıb ehtiyatlanırdılar. Hapalın əlini üç dəfə su stəkanına aparması, Hamşikin siyasi cavabları təhlükədən xəbər verirdi. Lakin matçın ilk dəqiqələri durumun fərqli olacağını göstərirdi. Meydanda fırtına kimi əsən, istədiyi hər şeyi edən qonaq komanda təkcə rəqibini yox, trbunalara toplaşan 10 minə yaxın yerli fanatı da təəccübləndirməyi bacardı. Azarkeşlərin etiraz səsləri kiməydi, anlaya bilmədik. Ancaq 90 dəqiqə boyunca narazı davrandılar. Gecənin qəhrəmanı isə dublla, ən vacibi, vurduğu iki baxımlı qolla yadda qalan kapitan idi. Hamşik Bakıya ilk dəfə gəldiyini və rəqib haqda məlumatsız olduğunu demişdi. Yəqin ki, bundan sonra uzun illər Bakını və gözəl quruluşa malik “Bakcell Arena”nı xatırlayacaq. Azərbaycandakı qarşılaşmaya qədər Slovakiya millisinin ən sərrast futbolçusu 23 qolla Robert Vittek idisə, artıq bu ad hesabında 24 top olan Marekindi”.
HƏBİB hazırladı
