Sizin reklam burada

Maksim Medvedev acı reallıqları etiraf etdi

Baxış Sayı:421

Maksim Medvedev acı reallıqları etiraf etdi
"Bir Mahirimiz var, o da Azərbaycanda qalsa, parlaq gələcəyi olmayacaq"
Millinin kapitanı Maksim Medvedev Macarıstanla oyundan sonra media nümayəndələrinin suallarını cavabladı. “Qarabağ”lı maraqlı fikirləri ilə diqqəti çəkdi.
- Oyun haqda fikirlərini bilmək istərdik.
- Yaxşı hazırlaşmışdıq. Rəqibin oyun üslubunu bilirdik. Əsas üstünlükləri fiziki cəhətdən güclü, ucaboy olmalarıdı. Amma bu cür rəqiblərə qarşı nə qədər yaxşı hazırlaşsan da, yenə problem yaşayırsan. Çalışırdıq ki, bizə verilən tapşırıqlara əməl edək, amma bəzi şeylər alınırdı, bəzisi isə yox. Məğlubiyyətə görə çox məyusuq. Sabah oyunu təhlil edəcəyik, qarşıda Slovakiya ilə matç var. İnanıram ki, həmin qarşılaşmada yaxşı çıxış edəcəyik.
- Bugünkü oyun gələcək üçün nə vəd edir?
- Hər oyun bizim üçün bir imtahandı. Hər qarşılaşmadan sonra çalışırıq ki, səhvlərimizdən dərs çıxaraq. Bəzi xətalar var ki, onları etməməliydik. Çünki komandada təcrübəli oyunçular var. Amma məğlub olanda əsəbi futbol oynayırıq və məşqçinin tapşırıqları yaddan çıxır. Ona görə də oyun “sınır” və yenidən bərpa olmaq çətin olur. Çalışmalıyıq ki, 90 dəqiqə ərzində eyni səviyyədə mübarizə apara bilək.
- Azarkeşlərə sözün varmı?
- Gəldikləri və dəstəklədikləri üçün təşəkkür edirəm. Ekran qarşısında olanlara da minnətdarıq. İstəməzdik ki, belə olsun. Amma futboldan başı çıxan azarkeşlər bilir ki, nə qədər çalışsan da, səviyyə fərqi hiss olunur. Bizim əksər futbolçularımız yerli çempionatda çıxış edir, amma macarlar daha yaxşı və səviyyəli birinciliklərdə oynayırlar. Aramızda səviyyə söhbəti var. Amma yenə də sona qədər bizə dəstək olurlar.
- Millimiz Xorvatiyaya qarşı sanki daha yaxşı oynamışdı...
- Xorvatiya ilə oyuna biz “2-ci nömrə” kimi çıxmışdıq. Bilirdik ki, onlara qarşı səfərdə açıq futbol oynamaq mümkün deyil. Təcrübə fərqi var. Amma bu gün çalışdıq ki, başabaş oynayaq. Standart vəziyyətlərdən elə qollar buraxdıq ki, özümüz özümüzdən inciyirik.
- Bu məğlubiyyət seçmə mərhələdə qarşınıza qoyulan hədəflərə çatmaq baxımından nə dərəcədə rol oynayacaq?
- AÇ-2020 şansımız çox azdı. Onsuz da qrupun autsayderi hesab olunuruq. Bu gün iddia etsək ki, əsas məqsədimiz qitə birinciliyində iştirak eləməkdi, bu, bir az ucadan danışmaq olar. Bizim əsas məqsədimiz qrupumuzdakı komandalara problem yaratmaqdı. Hələ ki birinci yer uğrunda vuruşmaq gücündə deyilik.
- Nə vaxta qədər məqsəd elə kiməsə problem yaratmaq olacaq? Biz nə vaxt iddialı olacağıq?
- Mənim 30 yaşım var, digər yoldaşların 28-32 yaşı var. Bizdən keçib artıq, ümidimiz odu ki, gənclər çıxıb xaricdə oynasınlar. Bir Mahirimiz var, o da Azərbaycanda qalırsa, parlaq gələcəyi olmayacaq. Çalışmalıyıq ki, gənclərin hamısı xaricdə oynasınlar. Bu gün çempionatımızda 8 komanda var, “Qarabağ”ın, “Qəbələ”nin, “Neftçi”nin heyətinin yarısı əcnəbidi. Bəs bizim gənclərimiz nə vaxt oynayacaqlar? Ancaq toplanışdan-toplanışa oynayırlar, uduzanda da hamı düşür üstlərinə. Onlar nə vaxt oynayırlar ki? Ya son 15-20 dəqiqədə çıxırlar meydana, ya da limitə görə bir gənc oyunçu şans qazanır. Onların da 3-4-ü millidədi. Gənclər xaricdə oynamalıdı ki, yeni qan gəlsin. Qonşularımıza baxaq. Məsələn, Gürcüstan vaxtında düzgün siyasət seçdi, indi də nəticə əldə edə bilir. Bizdə isə 8 komanda var, hamısı təzyiq altında oynayır, gənclərə isə meydanda yer olmur.
- Slovakiya ilə oyundan nə gözləyək?
- Həmin oyun haqda düşünmək istəmirəm. Çox yorğun və əsəbiyəm. Amma istəyirik ki, bundan yaxşı oynayaq, nə dərəcədə alınacaq, onu gələcək göstərəcək. Heyət, anlaşma baxımından problemlərimiz var. Son 10 oyunun heç ikisində eyni heyət meydanda olmayıb. Tez-tez dəyişikliklər olur ki, bu da bizə mənfi təsir edir
MİRAĞA

Oxşar xəbərlər
SON XƏBƏRLƏR