Tural Əsgərov: “100 mini öz cibindən ödəyib sərbəst olacaq”
Çempionluq şansını son anda əldən verən “Neftçi” hazırda transfer çalışmaları üzərində “baş sındırır”. Avroliqada mübarizə aparacaq “ağ-qaralar”ın qarşısında duran əsas məqsəd heyəti komplektləşdirməkdi. Üç nəfərlə - Məhəmməd Mirzəbəyov, Qoran Paratski və Petru Raku ilə yollar ayrıldığından, onların boşluğunu doldurmaq vacibdi. Bu isə o deməkdi ki, azı üç yeni futbolçu ilə müqavilə bağlanacaq. Belələrinin arasında “Qəbələ” ilə yolları ayıran Rauf Əliyevlə Stiven Jozef-Monrozun adlarını çəkə bilərik.
Məhz bu iki hücumameyilli oyunçunun gəlişindən sonra Mirabdulla Abbasovun “Neftçi”də qalmayacağı gün kimi aydındı. Onsuz da Roberto Bordinin israrla Canluka Sansoneyə əsas heyətdə yer verməsi yığma üzvünün çıxışına təsir etmişdi. Belədə Mirabdulla komandanı tərk edəcəyini mövsum bitər-bitməz qətiləşdirmişdi. Jozef-Monrozla Əliyevin transferindən sonra Abbasovun qalmasında məna yoxdu. Adam daim meydanda olmaq, qolları sıralamaq istəyir. Təbii ki, Bordin Baqali Dabo, Canluka Sansone, Stiven Jozef-Monroz kimi legionerləri qoyub “11-liy”in üzvü kimi Mirabdullaya güvənməyəcək.
Bu işdə futbolçunun agenti olan Tural Əsgərov fəallıq göstərir. Onun məqsədi futbolçunun istəyini yerinə yetirmək, yəni müştərisinin “Neftçi”dən ayrılmasına kömək etmək və daim oynayacağı komandaya keçməsinə şərait yaratmaqdı. Bildiyimizə görə, hətta Tural bəyin klub rəhbərliyi ilə danışığı da olub. Təfərrüatı öyrənmək, Abbasovla bağlı indiki duruma aydınlıq gətirmək üçün Əsgərovla əlaqə saxladıq: “Mirabdulla Abbasovun ”Neftçi”ni tərk edəcəyi böyük ölçüdə dəqiqdi. Futbolçu özü də mənimlə söhbətdə bunu açıq-aydın bildirib. Sansonenin kölgəsində qalmaqdansa, başqa komandada özünü göstərməkdə maraqlıdı. Düzdü, klubla müqaviləsi var. Amma müqavilədə göstərilib ki, Abbasov 100 min manat ödəməklə azad agent statusuna sahib ola bilər. Həmin pulu da öz cibindən ödəyib sərbəst olacaq. Sadəcə, hazırda yığmanın düşərgəsindədi deyə, bütün fikrini ora cəmləyib. Ona görə də hələ “Neftçi” mövzusuna toxunmuruq. Millinin oyunlarından sonra bu məsələyə qayıdacağıq.
O ki qaldı təkliflərə, demək olar, bütün komandalardan təklifi var. Amma agent kimi mənim əsas istəyim və hədəfim onu Avropaya aparmaqdı. Legioner həyatı yaşamasında maraqlıyam. Elə özü də. Amma yaxşı klubla anlaşması üçün son mövsümdəki göstəriciləri də ürəkaçan olmalıdı. Əcnəbi funksioner adama sual verir ki, bu futbolçu niyə ötən yay ilk cəhddəcə “Uypeşt” “səddində ilişən” komandanın əsas heyətində möhkəmlənə bilməyib? Reallığı və sualın cavabını siz və mən yaxşı bilsək də, bunu onlara başa salmaq olmur. Deyə bilmirəm ki, Bordin yaxşı-pis demədən öz istəyi ilə komandaya cəlb olunan Sansoneni oynadırdı, klub rəhbərliyi də ona dəstək verirdi. Çünki bu detallar həmin klubun rəsmisinə maraqlı deyil. Məhz buna görə legioner həyatı yaşamaq məsələsi bir az çətinləşib. Eybi yox, az qol vurardı, amma daim oynayardı. Belədə nəsə etmək asanlaşır. İstənilən halda, Mirabdullanın Avropa ölkələrinin birində oynaması üçün çalışıram, əlimdən gələni edirəm. İnşallah, alınar. Allah eləməsin, alınmasa da, qarşıdakı 1 ildə yerli komandaların birində oynayar və legioner məsələsinə gələn yay yenidən qayıdarıq. Avropa məsələsində cavab alaq, ondan sonra yerli klub mövzusuna baxarıq. Ona görə də indidən nəsə demək olmur”.
HƏBİB
