“Bu zövqverici idi, hər şeyə görə təşəkkür edirəm"
Vild-Donald Gerye dünən "Qarabağ"dan ayrıldığını açıqlayıb. Daha doğrusu, qaradərili futbolçu bu haqda "instaqram"dakı şəxsi səhifəsində yazıb: “Bu zövqverici idi. Hər şeyə görə təşəkkür edirəm".
Qeyd edək ki, Haiti millisinin üzvü olan Vild-Donald Gerye "Qarabağ"a 2 il öncə transfer olunmuşdu. Sol cinah müdafiəçisi müqaviləsinin müddəti bitəndən sonra yeni anlaşmada daha yaxşı maddi şərtlərin olmasını tələb edirdi. Ötən saylarımızda bu məbləğin 450 min dollar olduğunu yazmışdıq. Görünür, tərəflər ortaq məxrəcə gələ bilməyiblər və bu üzdən də yolları ayırmaq məqsədəuyğun sayılıb.
"Qarabağ"la bağlı daha bir xəbəri diqqətinizə çatdıraq. Ağdamlıların çexiyalı qapıçı Vatslav Qladkini transfer etmək planı baş tutmayıb. Moskva "Spartak"ından və İngiltərənin iki klubundan təklif alan təcrübəli qolkiper Azərbaycan çempionunun sıralarına qoşulmaqdan imtina edib. Halbuki deyilənə görə, müştərilər arasında ən realı və yüksək maaş verən təmsilçimiz olub. Çexiyalı qapıçı gəlmək istəməməsini çempionatın səviyyəsi, klub sayı və azarkeş azlığı ilə əlaqələndirib.