Sizin reklam burada

Böyük Britaniyanın ölkəmizdəki səfiri Tofiq Bəhramovu yada saldı

Baxış Sayı:331

Böyük Britaniyanın ölkəmizdəki səfiri Tofiq Bəhramovu yada saldı
Böyük Britaniyanın ölkəmizdəki səfiri Kerol Krofts Avropa Liqasının final qarşılaşması ilə əlaqədar dünən mətbuat konfransı keçirib. Bir çox maraqlı məqamlara toxunan xanım diplomat Tofiq Bəhramovu da yada salıb: “Azərbaycan beynəlxalq tədbirlərin keçirilməsində kifayət qədər böyük təcrübəyə malikdi. Britaniyanın Bakıdakı səfirliyi Azərbaycan hökuməti, hər iki ölkənin futbol federasiyaları, klubları ilə fəal əməkdaşlıq edir və bu sahədə çox işlər görülüb. Avropa Liqasının final qarşılaşması ilə bağlı səfirlik Bakıya gələcək ingilis azarkeşlər üçün lazımi məlumatların olduğu xüsusi broşür hazırlayıb”.
28 May – Respublika Günü münasibətilə Azərbaycan xalqını təbrik edən Kerol Krofts ölkələrimiz arasında idman sahəsində əlaqələrdən danışarkən, Bakıda keçiriləcək final oyununun əhəmiyyətini xüsusi qeyd edib. Kerol Krofts futbol üzrə İngiltərə millisinin 1966-cı ildə azərbaycanlı yan xətt hakimi Tofiq Bəhramovun düzgün qərarı sayəsində tarixində ilk dəfə dünya çempionu olduğunu bildirib: “Böyük Britaniya - Azərbaycan futbol əlaqələri barədə danışarkən ilk ağla gələn Tofiq Bəhramovdu. 1966-cı ildə keçirilən dünya çempionatının ildönümü ilə əlaqədar 2016-cı ildə biz Tofiq Bəhramovun ailəsini ziyarət etdik. Tofiq Bəhramovun ailəsi bizə onun arxivindən fotoşəkillər təqdim etdi. Həmin fotoşəkillər Azərbaycanla Böyük Britaniya arasında yüksək səviyyəli əlaqələrin rəmzlərindən biridi. Həmin il Tofiq Bəhramovun ailəsi Kraliça II Yelizavetanın doğum günü məclisinə dəvət edilib və orda onlara Tofiq Bəhramovun tarixi oyunda geydiyi forma təqdim olunub”.
Səfir Böyük Britaniya vətəndaşlarının Azərbaycana təkcə futbol matçlarında yox, “Formula-1”, cüdo və idmanın başqa növləri üzrə keçirilən yarışları izləmək üçün də səfər etdiklərini bildirib. Ölkəmizdə Birləşmiş Krallığın 500-dək şirkətinin fəaliyyət göstərdiyini və Britaniya icmasının mövcudluğunu qeyd edən diplomat bildirib ki, Avropa Liqasının “Arsenal” və “Çelsi” klubları arasında oynanılacaq final qarşılaşması ilə əlaqədar səfirlik AFFA və Azərbaycan hökuməti, eləcə də Britaniya polisi ilə sıx əməkdaşlıq edir. Səfirlik daha çox Britaniya vətəndaşının final oyununu izləmək üçün Bakıya gəlməsinə çalışır. O, final günü bir neçə çarter reysi ilə azarkeşlərin Bakıya gələcəklərini bildirib. Diplomat final qarşılaşmasının möhtəşəm alınacağına əminliyini də ifadə edib.

Oxşar xəbərlər
SON XƏBƏRLƏR