Sizin reklam burada

“Kennedini heç belə qorumurdular, nəinki Mxitaryanı”

Baxış Sayı:4 998

“Kennedini heç belə qorumurdular, nəinki Mxitaryanı”
İngilislərin hay-küyü Rövşən Əsgərova qəribə görünür
Rövşən Əsgərovu daha çox “Nə, harda, nə vaxt” intellektual oyunundan tanısaq da, o hazırda Rusiyada jurnalist fəaliyyəti ilə məşğul olur. Avropa Liqasının Bakıda keçiriləcək finalı ərəfəsində Rövşən bəy sport24.ru portalına müsahibə verib. Həmin müsahibəni diqqətinizə çatdırırıq.
- Avropa Liqasının finalının Bakıda keçiriləcəyini biləndə hansı hissləri keçirdiz?
- Bu günə kimi nə olubsa, hamısı isinmə hərəkətləridi. Avropa Liqasının finalı isə AÇ-2020 ərəfəsində yüngül məşqdi. Hətta “Avroviziya” musiqi müsabiqəsi də futbolun yanında kiçik görünür. Moskvada hər şeyə “Lujniki”də keçirilən Avropa Liqasının finalından başlanmışdı. Bu da onu göstərir ki, Bakı tədricən dünya idmanın elitasına çıxır. Sənə kişilər arasında təşkil olunan böyük turnirin finalını etibar edirlərsə, bu artıq ciddi imtahandı. Avropa Liqasının həlledici qarşılaşmasını 17 yaşadək qızlar arasında təşkil olunan dünya çempionatı ilə müqayisə etmək olmaz. Mənə elə gəlir, hər şey yaxşı olacaq. Adətən, Bakı hansısa işin altına girirsə, onun öhdəsindən gəlməyi bacarır.
- Bu yaxınlarda Bakıda olmusuz. Şəhərdə finalın ab-havası hiss olunur?
- Paytaxtda, demək olar ki, hər dirəkdə “Çelsi” və “Arsenal”ın oyunçularının şəkilləri yerləşdirilib, finalla bağlı çox sayda plakatlar asılıb. Mərkəzi meydanda böyük top qoyulub, geriyəsayım başlayıb. Bir sözlə, Bakı finalı gözləyir. Ona görə də deyirəm ki, heç bir tədbiri futbolla müqayisə etmək düz deyil.
- Hər iki finalçı İngiltərəni təmsil edir. Son bir həftədə ingilislərdən ancaq tənqidi fikirlər eşitmək mümkündü. Onlar yolun uzaq, otellərin baha olmasından şikayət edirlər. Narazılıq doğuran məqamlardan hansı sizə daha çox təəccüblü gəldi?
- Çox qeyri-adi şərait yaranıb. Xüsusilə də ingilis klubların mövqeyi mənə qəribə gəlir. İndi nə istəsələr, danışa bilərlər. Ancaq onlar əvvəlcədən bilirdilər ki, finala çıxacaqları halda hara yollanacaqlar. “Ayntraxt”la penalti seriyasında siz bilirdiz axı növbəti görüşü Bakıda keçirməlisiz... Həmin an deyə bilərdiz ki, “bizim Bakıda nə işimiz var. Ora yollanmaq bizə lazım deyil və Çempionlar Liqasına vəsiqəni də premyer-liqada 4-cü pilləni tutmaqla əldə edəcəyik”. Çox maraqlıdı ki, onlar bilə-bilə ki, etirazları, şikayətləri heç nəyi dəyişməyəcək, yenə boş-boş açıqlamalar verməkdə davam edirlər. Bir tərəfdən də bu yaxşı haldı. Hamı bu finaldan danışır. İstənilən xatırlama – başsağlığından başqa – işə yarayır. Hərdən adama elə gəlir ki, Avropa Liqasının finalından daha çox danışılır, nəinki Çempionlar Liqasının həlledici qarşılaşmasından. Hətta Madridə gedən Klopp belə Bakı barədə fikirlərini açıqlayıb. Bəlkə ona əlavə ödəniş etmək lazımdı ki, tez-tez bizi yada salsın? Danışacaqlar, narazılıq edəcəklər, ancaq sonda gələcəklər və oynayacaqlar. Hər şey də ürəklərincə olacaq. Bəli, Londondan Bakıya cəmi bir reys var. Ancaq bu futbolla bağlı problemi deyil axı. Bu haqda AZAL düşünməlidi: vaxtında başqa ucuz aviaşirkətləri bazardan sıxıb çıxarmaq lazım deyildi. Turizm Nazirliyi də bəzi məsələlər barədə fikirləşməlidi. Gələn il Bakıda AÇ-2020-nin 4 qarşılaşması keçiriləcək ki, onlardan biri də pley-off oyunudu. Bu dəfə elə alındı ki, əsas oyunda iki London klubu üz-üzə gələcək. Hər iksi də İngiltərə paytaxtından Bakıya uçmalıdı. Bəlkə də bu üzdən onlar narazılıq edirlər. Bir tərəfdən də bu görüş İngiltərə çempionatının 39-cu turu deyil ki... Finalı canlı izləmək üçün Türkiyədən, Rusiyadan, İrandan, Şərqi Avropadan futbolsevərlər Azərbaycan paytaxtına gələcəklər. Tək finalın iştirakçılarını yox, azarkeşlərin də marağını nəzərə almaq lazımdı.
- Belə çıxır ki, UEFA hər iki klubun azarkeşlərinə cəmi 6 min bilet ayırmaqla daha çox bitərəf azarkeşlərin stadionu dolduracağına ümid bəsləyib...
- Bakı Şərq və Qərb arasında körpüdü. Elə paytaxtın özündə də İngiltərə futbolunun yetərincə azarkeşi var. Dostlarımın çoxu isə “Barselona” və “Yuventus”a azarkeşlik edir ki, onların futbol zövqünün o qədər də yüksək olduğunu düşünmürəm. Məncə, İngiltərə və Almaniya futboluna baxmaq lazımdı. İngiltərə premyer-liqası isə ən cəlbedici çempionatdı. İstənilən halda, stadionun tam dolacağını fikirləşirəm. Ümumi götürəndə isə bu UEFA-nın problemidi. Bakı finalı yüksək səviyyədə keçirəcək.
- Təşkilatçılıq işləriylə bağlı Bakı üçün ən böyük çətinlik nədi?
- Mən heç vaxt belə tədbir təşkil etməmişəm. Avropa Liqasının finalı ilə “Nə, harda, nə vaxt” oyununun finalını tərəzinin eyni gözünə qoymaq düzgün deyil. Bakı çoxdan Avropa şəhəridi. Asudə vaxtı istədiyin kimi keçirmək üçün orda hər cür şərait var. Bu ekzotika deyil, mükəmməl infrastrukturdu. Şəhər bir neçə ildi “Formula-1” kimi sirki qəbul edrsə, bu artıq hər şeydən xəbər verir. Bu yöndə heç bir problem yoxdu. Sadəcə, Moskvadan Bakıya hər gün 7, Londondan isə həftənin müxtəlif günlərində bir təyyarə reysi var. Ona görə də çarterlər təşkil etmək lazımdı. Bu məsələ ilə artıq nəqliyyat sistemində çalışanlar məşğul olmalıdılar.
- Henrix Mxitaryan Bakıda oynamayacaq. Bu düzdü? Belə şəraitdə hansı variant daha düzgün olardı?
- Bildiyim qədər Mxitaryan “Arsenal”ın heç əsas heyət üzvü deyil.
- Bunun nə fərqi var? İstənilən halda, onun adı iştirak ərizəsində olmalıdı.
- İştirak ərizəsində... Həmin siyahıda xeyli sayda adamın adı var. Bu onun, məşqçinin, klubun qərarıdı. Biz onlara “Mxitaryanı mütləq gətirin ki, onu görsünlər” deyə bilmərik. Onun təhlükəsizliyinin təmin olunacağı ilə bağlı yüksək səviyyədə təminat verilmişdi. Biz bunu edə bilərdik və etdik. Mxitaryanı zorla Bakıya gətirmək və ictimaiyyətə göstərmək ki, Azərbaycanda təhlükəsizliklə bağlı problem yoxdu - bizim səlahiyyətimizdə olmayan bir şeydi. Ümumiyyətlə, bu mövzunu şişirtməyə ehtiyac yoxdu. “Arsenal” finalda uduzsa, deyəcəklər ki, həmin futbolçu komanda ilə birgə olsaydı, qalib gələcəkdik. Ancaq bu nə bizim, nə Bakının, nə də təşkilatçıların problemidi. Qərar verən futbolçu və klubudu. Henrixin bir neçə ay öncə Bakıya gəlmədiyi məlumdu. “Çelsi” də “Qarabağ” deyil. Bizim klubumuzla oyunda “Arsenal” Mxitaryansız da qalib gəldi. Özləri də həmin vaxt bunu yaxşı başa düşürdülər. Ancaq “topçular” onu da bilirdilər ki, finala çıxmaqla hara yollanacaqlar. İndi bu məsələni qabartmaq, qalmaqal yaratmaq nəyə lazımdı? Ümid edirəm ki, final görüşü o qədər baxımlı olacaq ki, sonradan heç kim bu haqda düşünməyəcək. Xüsusilə “Arsenal” tərəfi.
- Azərbaycanla Ermənistan arasında münaqişə 30 il əvvəl başalayıb...
- 31 il.
- Münaqişənin idmana sirayət etməsi nə dərəcədə düzdü?
- Erməni idmançılar 1-ci Avropa Oyunlarında Azərbaycana gəliblər, medallar qazanıblar. Bakıda dəfələrlə böyük idman tədbirləri keçrilib və heç zaman problem yaşanmayıb. Siz özünüz bu barədə nəsə eşitmisiz? Təhlükəsizlik söz verilibsə, təmin olunub. Özü də belə böyük miqyasda. Kennedini heç belə qorumurdular, nəinki Mxitaryanı. Ortada ölkənin nüfuzundan söhbət gedirsə, vəziyyət anlaşılandı.
- Siz Andrey Arşavinin Azərbaycanda keçirdiyi məzuniyyətdən danışmışdız. Oranı bəyənmişdi?
- Razı qaldığı görünürdü. O xanımına “burda heç nəyi tərifləmə” deyib, səbəbini də izah etmişdi: “burda nəyisə bəyəndiyini desən, o dəqiqə sənə hədiyyə edəcəklər”. Xalçalar, qablar... Arşavin daha sonra “Rolex” və avtomobil barədə də heç nə demə, yoxsa onu da hədiyyə edəcəklər” demişdi. O geri qayıdanda hədiyyə və suvenirlərlə dolu çemodanı var idi. Hər şey əla idi. Arşavin ölkəni görmək istəyirdi. Ona şəlalələri, dağları və şəhəri göstərdik. Bundan başqa, “Qəbələ”nin təlim-məşq bazasında da oldu. Andrey həmin vaxt bazanın Avropa klublarının müasir bazalarından heç də geri qalmadığını vurğulamışdı. Səhv etmirəmsə, həmin vaxt “Qəbələ”nin baş məşqçisi “Arsenal”ın sabiq oyunçusu Toni Adams idi.
- Finala gedəcəksiz?
- Avropa Liqasını o qədər də bəyənmirəm. Turnirin əsas mükafatı Çempionlar Liqasına vəsiqə qazanmaqdı. Mənə elə gəlir, bu turnir bir qədər natamamdı. Bir dəfə Bekkerdən (tennisçi) soruşurlar: “Uimbldon” turnirini udmaqdan daha yaxşı nə ola bilər?” Bilirsiz, nə cavab verib: “İkinci dəfə bu turniri udmaq”. Avropa Liqası ilə bağlı eyni fikirləri səsləndirmək olmaz. “Avropa Liqasında qalib olub Çempionlar Liqasına vəsiqə qazanmaq istəyirik” fikri artıq özlüyündə tunirin ikinci dərəcəli olduğunu göstərir.
RƏŞAD hazırladı

Oxşar xəbərlər
SON XƏBƏRLƏR