PFL mövsümü 150 min manat qazancla başa vurdu
Mayın 21-də AFFA-nın İntizam Komitəsinin növbəti iclası keçirilib. Toplantı mövsümün son oyununda – ölkə kubokunun finalında baş verən qayda pozuntularının müzakirəsinə həsr olunub. Ayın 19-da Naxçıvanda keçirilən final matçının hər iki iştirakçısı mövsümü cərimə ilə başa vurub. “Sumqayıt” 800 manat, qalib “Qəbələ” isə onun ikiqatı məbləğində “tərləyəcək”. “Qırmızı-qaralar”ın heyətində 4 futbolçu sarı vərəqə ilə cəzalanıb ki, belədə avtomatik “40-cı maddə” işə düşüb. “Sumqayıt”ı isə Cavid Tağıyev ziyana salıb. Görüşə əlavə olunmuş dəqiqələrdə kobud oyuna görə birbaşa qırmızı vərəqə alaraq meydandan kənarlaşdırılan yarımmüdafiəçi 2 oyunluq cəza alıb, klubu 1600 manat cərimələnib. Futbolçunun cəzası növbəti kubok mövsümünə şamil olunacaq.
Beləliklə, komitə klublara 2400 manat cərimə kəsib. Nəticədə mövsüm ərzində cərimə sanksiyaları üzrə nəzərdə tutulan yekun məbləğ 149740 manata çatıb. Yeri gəlmişkən, ötən mövsüm PFL cərimələrdən 137260 manat qazanmışdı. Başqa sözlə, 2018/19 mövsümündə klublar daha çox ziyana düşüb.