Sizin reklam burada

“Finalçılar hərəyə 10 min bilet də ala bilər”

Baxış Sayı:345

“Finalçılar hərəyə 10 min bilet də ala bilər”
İngiltərə klubları Elxan Məmmədovu təəccübləndirib
AFFA-nın baş katibi Elxan Məmmədov son günlərin ən aktual mövzularından olan bilet məsələsi ilə bağlı danışarkən Avroliqanın final oyununda qarşılaşacaq klublardan hər birinin əlavə 10 min bilet əldə elə biləcəyini vurğulayıb.
Məmmədov bu haqda açıqlamanı dünən İngiltərənin “Daily Mail” nəşrinə verib. Məlum olduğu kimi, UEFA əvvəlcədən hər kluba 6 min bilet ayıracağını bildirib ki, bu xəbər də xüsusən “Arsenal”ın düşərgəsində ciddi narazılıqla qarşılanıb. Bu məqam üzərində dayanan baş katib isə hər iki klubun azarkeşləri üçün əlavə çarter reysləri təşkil edə biləcəyini vurğulayıb, eyni zamanda hələ də bilet almayan azarkeşləri birbaşa ticketing@baku2019.az və ya asif.aliyev@baku2019.az elektron poçtuna məktub göndərməyə səsləyib: “UEFA-nın qərarı belədi ki, klub çarter reysi və istədiyi biletlərin sayı ilə bağlı ətraflı bilgi təqdim edərsə, bu qurum həmin sayda bilet ayıra bilər. UEFA stadionda boş oturacaqların qalmaması üçün heç kimə lazım olandan artıq bilet vermək istəmir. Klublar çarter reyslərinin uçuş cədvəlini təqdim edən kimi UEFA onlara bilet ayıracaq. Klublar bundan xəbərdardı, bu informasiyanı bir neçə gün əvvəl Bakıdakı görüşdə onlara çatdırmışıq. Mənim üçün çox qəribədi ki, hələ də çarter reysləri təşkil olunmayıb. Biz 4000 kilometr məsafədə yerləşdiyimizdən çarter reyslərinin təşkili daha yaxşı yoldu. UEFA klublarla birbaşa əlaqədədi və onlar üçün bilet saxlayır. Bəli, biz daha çox reys təşkil edə bilərdik, ancaq finalçıların adını yalnız mayın 9-da bildik. Bu qısa zaman kəsiyidi, adətən, belə durumlarda klublar müstəqil şəkildə öz turizm agentlikləri ilə çalışırlar, ancaq onlar bunu etməyiblər”.
Elxan Məmmədovun verdiyi bilgiyə görə, dünənə qədər bütün dünya ərazisində onlayn rejimində 25 mindən artıq bilet satılıb, daha 10 min bilet isə Bakıda offlayn satış yolu ilə sahibini tapıb: “Futbol artıq Avropa ölkələrinin sərhədlərindən kənara çıxır. Aparıcı futbol ölkələri həmişə futbolun sərhədlərini genişləndirməyə çalışırlar, futbolun dəyərləri daha da genişlənməli və yeni imkanlar açmalıdı. Azərbaycan futbol üçün yeni, gənc imkanlardan biridi. Biz və başqa qonşu ölkələr belə tədbirlər keçirməyi haqq etmişik, bu gün həqiqətən də futbola nəsə bəxş edə bilərik. Hər belə hadisə dünyaya yalnız pozitiv qazandırır”.
Bu məsələ ilə bağlı daha bir maraqlı məqam odu ki, AFFA mayın 15-də yaxın günlərdə Avroliqanın finalına bilet satışının üçüncü mərhələsinin həyata keçiriləcəyini elan etmişdi. Artıq bu həftəsonu azərbaycanlı azarkeşlər “Gənclik Mall” və “Port Baku”da yerləşən satış məntəqələrinə baş çəkməklə bilet almaq imkanı qazanacaqdı. Amma belə görünür ki, ingilisləri səs-küyü və daha çox bilet almaq tələbi AFFA-nı çıxılmaz vəziyyətdə qoyub və əvvəlki fikrindən daşındırıb. Hadisələrin inkişafını diqqət mərkəzində saxlayırıq...
ORXAN

Oxşar xəbərlər
SON XƏBƏRLƏR