Mayın 14-də AFFA-nın İntizam Komitəsinin növbəti iclası keçirilib. Toplantı premyer-liqanın və birinci divizionun sonuncu turunun oyunlarında yaşanan qayda pozuntularının müzakirəsinə həsr olunub.
Premyer-liqanın 28-ci turunun “Səbail” – “Keşlə” matçı hər iki tərəfin ziyana düşməsi ilə yadda qalıb. Meydan sahibləri sarı vərəqə sayının dördə çatması səbəbindən 800 manat “tərləyib”. “Keşlə”ni isə oyunun 51-ci dəqiqəsində ikinci xəbərdarlıqdan sonra komandasını azlıqda qoyan Edvinas Girdvainis 200 manat ziyana salıb. Müdafiəçi 1 oyunluq cəzalanıb. Ancaq çox güman, onun cəzası təxirə salınacaq. Çünki Girdvainisin adı komandadan göndəriləcək futbolçuların sırasındadı. “Qəbələ” və “Qarabağ” da son turda sarı vərəqə bolluğu ilə üzləşib ki, hər ikisi avtomatik “40-cı maddə”yə düşüblər.
Diviziona gəlincə, “birincilər”in yarışında da 4 komanda vərəqəyə görə cərimələnib. “Turan Tovuz”, “Şüvəlan, “Səbail-2” və “Keşlə-2” buna görə hərəyə 80 (cəmi 320) manat ödəyəcəklər. Ancaq sonuncuları “Zaqatala” ilə oyunun 69-cu dəqiqəsində birbaşa qırmızı vərəqə alan Əkbər Vəliyev daha 160 manat xərcə salıb. İntizamsız futbolçuya həmçinin 2 oyunluq cəza verilib. “Səbail-2”nin son turdakı rəqibi “Zirə-2” isə 28-ci dəqiqəsindən etibarən azlıqda mübarizə aparmalı olub. Hüseyn Əhmədovun ikinci “sarı”sı ona 1, klubuna 200 manat bahasına başa gəlib. “Qarabağ-2” – “Kəpəz” matçı isə qonaqların səhlənkarlığı ucbatından 10 dəqiqə gec başlayıb. Buna görə Gəncə klubu 240 manat cərimə ödəyəcək.
Beləliklə, komitə klublara 3520 manat cərimə kəsib. Nəticədə mövsümün əvvəlindən cərimə sanksiyaları üzrə nəzərdə tutulan məbləğ 147340 manata çatıb.