Sizin reklam burada

“Bakı Marafonu-2019”da 22320 nəfər iştirak etdi

Title
“Bakı Marafonu-2019”da 22320 nəfər iştirak etdi
İki təmsilçimiz üçüncü oldu
Dünən Heydər Əliyev Fondunun təşkilatçılığı ilə “Bakı Marafonu-2019” keçirilib. Marafonda Bakı Media Mərkəzinin prezidenti Arzu Əliyeva da iştirak edib. “Küləyə qalib gəl” şüarı altında 4-cü dəfə təşkil olunan marafon Dövlət Bayrağı Meydanından start götürərək, Bakı Olimpiya Stadionuna qədər 21 km məsafəni əhatə edib. Yarışda 16 yaşdan yuxarı şəxslər əvvəlcədən qeydiyyatdan keçərək iştirak ediblər. Marafona bu dəfə 22320 nəfər qatılıb. Mükafatlar uğrunda həmyerlilərimizlə yanaşı, ABŞ, Avstriya, Birləşmiş Ərəb Əmirlikləri, Böyük Britaniya, Cənubi Afrika, Fransa, İran, Rusiya, İspaniya, İtaliya, Türkiyə, Ukrayna, Uqanda və başqa ölkələrdən olan atletlər mübarizə aparıb. Səfirliklərin və diplomatik nümayəndəliklərin təmsilçiləri də iştirakçılar arasında olub. Builki marafona Heydər Əliyev Fondunun dəstəyi ilə protezlərlə təmin olunan bir qrup Qarabağ müharibəsi qazisi də qoşulub. Marşrut boyunca müxtəlif maraqlı əyləncəli proqramlar təqdim olunub, iştirakçıları DJ və aparıcılar, barabançılar müşayiət edib.
Mükafatlandırma mərasimi Bakı Olimpiya Stadionunda olub. “Bakı Marafonu 2019”un qalibləri iki kateqoriya üzrə müəyyənləşib. Kişilər arasında uqandalı atlet İsmail Ssenyange finiş xəttinə birinci çatıb. İran təmsilçisi Məhəmməd Cəfər Moradi ikinci, həmyerlimiz Elman Abışov üçüncü olub. Qadınlar arasında isə ukraynalı Valentina Poltavskaya, şotlandiyalı Suzanna Matonti və təmsilçimiz Anna Yusupova ilk “üçlük”də yer alıblar. Qalibə 3000, ikinci yerin sahibinə 2000, üçüncü olanlara isə 1000 manat mükafat, hədiyyələr, medal və sertifikatlar verilib. Həmçinin marafonun tərəfdaş və sponsorları iştirakçılara müxtəlif nominasiyalar üzrə mükafatlar təqdim ediblər. Qadın və kişi kateqoriyaları üzrə finiş xəttini ilk keçən tələbələr Parisdə - Disneylenddə tətil, korporativ iştirakçılar isə İstanbul marafonuna qeydiyyat və gediş-dönüş bileti qazanıblar. Marafon iştirakçısı olan Azərbaycan vətəndaşlarına bir neçə nominasiyada mükafatlar təqdim olunub. Qadın və kişi kateqoriyası üzrə finiş xəttini keçən ilk Azərbaycan vətəndaşları Gürcüstanda keçiriləcək “Wings for Life World Run 2020” marafonunda iştirak hüququ əldə ediblər. Həmçinin finiş xəttini ilk keçən 50 yaşdan yuxarı Azərbaycan vətəndaşlarına və finişə çatan ilk 5 azərbaycanlı xanıma müxtəlif hədiyyələr verilib. Finiş xəttini ilk keçən maraqlı kostyumlu marafonçu, 10 xarici marafonçu, 3 xanım nominasiyalar üzrə mükafatlandırılıb.
Həmçinin martın 4-dən mayın 1-dək marafonda iştirak üçün qeydiyyatdan keçənlər arasında lotereyanın qalibi olmuş iki nəfərə də hədiyyə təqdim olunub. Finiş xəttini keçən ilk 1000 iştirakçı “Bakı Marafonu-2019”un xüsusi medalı ilə təltif edilib. Yarışın eksklüziv tərəfdaşının “Azercell Telekom” olduğunu qeyd edək. Marafondan toplanan vəsait Heydər Əliyev Fondunun valideyn himayəsindən məhrum olan uşaqlarla bağlı layihəsinə yönəldiləcək.
Football-plus.az Məlumatlardan yararlandıqda istinad vacibdi. ✔ Məlumatlardan internet səhifələrində yararlanarkən müvafiq keçidin qoyulması vacibdi.