Ötən ilin avqustunda “Krılya Sovetov”la birillik müqavilə bağlayan Ramil Şeydayevin ulduzu bu ilin martında parladı. Yığmamızın da formasını geyən hücumçu martın 3-də “Lokomotiv”in, 9-da “Yenisey”in, 15-də isə “Anji”nin qapısına yol tapdı. Martın 21-də Xorvatiya ilə oyunda da fərqlənən Ramil yığmanın və klubunun heyətində iki oyunda susandan sonra aprelin 3-də “Orenburq”la səfər oyununda (1:3) komandasının təsəlli qolunu vurdu. Beləliklə, Ramil Rusiya çempionatının cari mövsümündə 4 qol vurub. Samara klubunun soydaşımızla müqaviləni yeniləmək niyyətində olduğunu nəzərə alsaq, çox güman, irəlidə qol sayını artırmaq mümkün olacaq. Amma biz statistika həvəskarlarının marağını düşünərək, Rusiya çempionatının arxivinə nəzər saldıq. Görəsən, bir mövsümə dörd və daha artıq qol vuran başqa futbolçularımız da varmı? Aşağıda uyğun statistika ilə tanış olacaqsız, Sadəcə, bir məqamı nəzərinizə çatdırmalıyıq. Biz həm Azərbaycan futbolunun yetirmələrini, həm də başqa respublikaların yetişdirdiyi azərbaycanlı futbolçuları hesaba almışıq. Məsələn, hər kəsə bəllidi ki, elə həmin Şeydayev Azərbaycan yox, Rusiya futbolunun yetirməsidi.
Rusiya elitasında bir mövsümə 4 və daha artıq top vuran futbolçularımız:
Nazim Süleymanov 17.02.1965 hücumçu
1992 Spartak (Vladiqafqaz) 26 oyun/12 qol
1993 Spartak (Vladiqafqaz) 31/14
1994 Spartak (Vladiqafqaz) 19/6
1995 Spartak-Alaniya (Vladiqafqaz) 13/4
1996 Alaniya (Vladiqafqaz) 25/11
Vəli Qasımov 04.10.1968 hücumçu
1992 Spartak, Dinamo (Moskva) 23/16
Vladislav Lemiş 20.08.1970 hücumçu
1992 Kuban (Krasnodar) 15/5
Lev Mayorov 13.10.1969 yarımmüdafiəçi
1996 Çernomorets (Novorossiysk) 33/4
Vyaçeslav Lıçkin 30.09.1973 yarımmüdafiəçi
1998 Tümen 11/4
Ramil Şeydayev 15.03.1996 hücumçu
2019 Krılya Sovetov (Samara) 10/4