"Sumqayıt" tarixində ilk dəfə finalda!
Dünən ölkə kubokunun finalına adlayan komandaların adına aydınlıq gəldi. Öncə onu qeyd edək ki, ilk oyunlarda qapılara cəmi 1 qol vurulmuşdusa, cavab görüşləri məhsuldar alındı. Belə ki, iki qarşılaşmada qapılara ümumilikdə 9 qol vuruldu. Cütlərin taleyini isə səfər qolları həll etdi.
Cari mövsüm çempionatdakı bütün qarşılaşmalarda "Qarabağ"a uduzan "Qəbələ" yarımfinalın ilk görüşündə 1 cavabsız qolla qalib gəlmişdi. Bəziləri "köhlən atlar"ın bu məğlubiyyətin əvəzini artıqlamasıyla çıxacağını, ötən mövsümdən fərqli finala vəsiqə qazanacağını düşünürdü. Əslində Qurban Qurbanovun yetirmələri buna yaxın idi. İlk yarıda Miçelin mükəmməl qolu ilə hesabı açan ağdamlılar ikinci yarının əvvəllərində Kintana ilə fərqi artırdı. Lakin Volkovun qolu məhz "qırmızı-qaralar"ı finala daşıdı. Bununla da bölgə təmsilçisi uğurlu seriyasını davam etdirdi. Belə ki, "Qəbələ" ardıcıl 3-cü dəfə finalda oynayacaq. Şimallılar həm də ümumilikdə 4-cü dəfə yarımfinal səddini uğurla dəf etdi. "Qırmızı-qaralar" son 3 "futbol ili" ilə yanaşı, 2013/14 mövsümündə də bunu bacarmışdı. Lakin komanda indiyə qədər heç vaxt kuboku başı üzərinə qaldırmayıb. İndiyədək kuboku "Neftçi", "Qarabağ" və "Keşlə"yə "güzəştə gedən" qəbələlilər uğursuz sindromu yeni rəqib - "Sumqayıt" ilə dueldə qırmaq niyyətindədi. Bu baş verərsə, komanda ilk titulunu qazanacaq. Qurban Qurbanovun yetirmələri isə ardıcıl ikinci mövsümdə, ümumilikdə 6-cı dəfə yarımfinal səddində "ilişdi". Ötən "futbol ili"ndə komanda 1/4 finalda mübarizəni dayandırmışdı. Bundan başqa, "köhlən atlar" 1993/94, 1996/97, 2003/04, 2011/12 və 2012/13 mövsümündə də finalın biraddımlığında dayanıb.
İlk oyunda qolsuz "sülh"ə razılaşan "Sumqayıt"la "Zirə" bu dəfə də heç-heçə etdilər. Lakin budəfəki bərabərlik "kimyaçılar"ı finala çıxardı. Oyun yetərincə dramatik alındı. İlk yarıda Babayinin het-trikindən sonra "qartallar"ın işinin bitdiyini düşünürdük. Ancaq ikinci yarıda Samir Abasovun komandası buraxılan qolların hamısının əvəzini çıxdı. Bununla belə, geridönüşü sona çatdırmaq - qələbə qolunu vurmaq üçün yetərli vaxt qalmamışdı. Qollu heç-heçə isə məhz Ayxan Abbasovun yetirmələrini həlledici matça daşıdı. Beləliklə, "gənclik şəhəri" təmsilçisi tarixində ilk dəfə final oynayacaq. Sonuncu dəfə kubokda belə hesabın nə zaman qeydə alındığını xatırlamaq isə çətindi.
Sonda onu da bildirək ki, "Qəbələ" ilə "Sumqayıt" arasındakı final matçı mayın 19-da saat 16.00-da Naxçıvanda baş tutacaq. Həm Sənan Qurbanov, həm də Ayxan Abbasov ilk dəfə baş məşqçi kimi final həyəcanı yaşayacaq. "Qəbələ" isə ikinci dəfə həlledici matç üçün Muxtar Respublikaya yollanacaq. İki il öncə "qırmızı-qaralar"ın Naxçıvan səfəri uğurlu alınmamış, onlar “Qarabağ"a uduzmuşdu.
Ölkə kuboku
yarımfinal, cavab oyunları
1 may
Qarabağ - Qəbələ 2:1
(ilk oyun - 0:1)
Zirə - Sumqayıt 3:3
(ilk oyun - 0:0)
FARİZ