Nail Kərimov: “Akademiya rəhbərlik üçün həmişə prioritet məsələ olub”
Artıq AFFA-nın bayrağı altında keçirilən müxtəlif yaş qruplarında da mövsüm başa çatmaq üzrədi. Bəzi yaş qruplarında qaliblər müəyyənləşsə də, qızıl medalların sahiblərinin bilinmədiyi liqalar da var ki, onlarda da yaxın günlərdə çempionlar məlum olacaq. Liqalarda “Qəbələ”nin aşağı yaş qruplarının hegemonluğuna hamı öyrəşib. “Qırmızı-qaralar”ın futbol akademiyasının komandaları çıxış etdikləri yaş qruplarında daim favoritlər arasında olublar ki, bu da başadüşüləndi. Ölkənin ən güclü akademiyasında həm öz yaş qrupunda seçilən uşaq və yeniyetmələr, həm də işinin mütəxəssisi olan məşqçilər toplaşıb. Ancaq cari mövsümdə “Qəbələ”nin aşağı yaş qrupları əvvəlki illərdən fərqli o qədər inamlı təsir bağışlamırlar. Düzdü, klubun U-19 və U-16 komandası 2018/19 “futbol ili”ni çempion kimi başa vurmağı bacardı. Ancaq şimallıların U-10, U-11, U12, U-13 və U-14 kollektivləri ümidləri doğrltmadı. U-10, U-11 mübarizəni 1/4 finalda dayandırıb. U-12 yarımfinalda “Neftçi” səddini aşa bilməyib. U-13 isə, ümumiyyətlə, pley-off görüşlərindən kənarda qalıb. U-14 yarımfinalda iki oyunun nəticəsinə görə “Binə”yə boyun əyib. Bütün bunları nəzərə alıb cari mövsümdə “Qəbələ” Futbol Akademiyasının yalnız iki yaş qrupunun, yuxarıda qeyd etdiyimiz kimi, U-16 və U-19-un klub muzeyini zəngilləşdirdiyini deyə bilərik. Qalan 5 yaş qrupunun zəif nəticə göstərməsi nədən qaynaqlanır, uğursuz çıxışın kökündə nə durur? Maraq üçün onu da qeyd edək ki, 2017/18 “futbol ili”ndə qəbələlilərin qazancı liqalarda 4 qızıl, 2 gümüş və 1 bürünc medal olmuşdu. Statistika da akademiyanın göstəricilərinin pisləşdiyini göstərir.
Bu və bizi maraqlandıran başqa məqamlara aydınlıq gətirmək üçün “Qəbələ” Futbol Akademiyasının baş meneceri Nail Kərimovla danışmağı lazım bildik: “Ötən həftənin 5-ci günü müxtəlif yaş qruplarının baş məşqçilərinin iştirakı ilə mövsümün yekunlarıyla bağlı toplantı keçirdik. Qeyd etdiyiniz kimi, U-19 və U-16 komandamız cari mövsümü çempion kimi başa vurdu. Ancaq aşağı yaş qruplarımız finala yüksələ bilmədilər. Buna görə o qədər də narahat deyilik. Çünki yarımfinal qarşılaşmalarında komandalarımız rəqibdən üstün futbol oynayıblar, sadəcə, ev və səfərdə vurulan qolların nisbətinə görə mübarizəni dayandırıblar. Toplantıda çatışmazlıqlar barədə fikir mübadiləsi apardıq. Bizim komandalarda bəzilərində olduğu kimi oyun bir və ya iki nəfər üzərində qurulmur. Akademiya olaraq, daha çox keyfiyyətli futbola üstünlük veririk. Xatırlayırsızsa, müxtəlif yaş qruplarımız liqalarda hegemonluq etdiyi dönəmdə mətbuata açıqlamalarımın birində “vaxt gələr, indiki durumun əksi ilə üzləşə bilərik” söyləmişdim. İndi həmin aqibəti yaşadıq”.
“Uğursuzluqda məşqçilərin payı nə qədərdi” sualına baş menecer belə cavab verdi: “Məşqçilərdən şikayətimiz yoxdu. Ola bilsin, hardasa cüzi xətaları olub. Ancaq bu o demək deyil ki, məhz onların işlərini layiqincə yerinə yetirməmələri səbəbindən müxtəlif yaş qrupu üzrə komandalarımız mövsümü titulsuz başa vurublar. Bir məqamı da qeyd etmək istəyirəm. Əvvəlki illərdən fərqli bu gün bəzi Bakı klublarında da uşaq futboluna xüsusi diqqət göstərilir ki, bu da nəticələrdə özünü göstərir. Belə deyim, indi liqalarda daha çox rəqabət hiss olunur”.
Nail bəylə söhbətdə “Qəbələ”də baş verən son dəyişikliklər ətrafında da fikir mübadiləsi apardıq. Görəsən, Tale Heydərovun prezident kürsüsündən getməsi akademiyanın fəaliyyətinə nə dərəcədə təsir göstərəcək? Həmsöhbətimiz narahatlığa heç bir əsas olmadığını bildirdi: “Klub prezidenti postunda dəyişiklik akademiyanın işinə təsir göstərməyəcək. Əvvəllər necə olubsa, elə də yolumuza davam edəcəyik. Akademiya rəhbərlik üçün həmişə prioritet məsələ olub və hər zaman da aşağı yaş qruplarına diqqət ayrılıb”.
RƏŞAD
