Sabah ölkə kubokunda yarımfinalın cavab görüşləri keçiriləcək. Beləliklə, mayın ilk günündə finalçıların adına aydınlıq gələcək. Əvvəlcə “Qarabağ” və “Qəbələ” münasibətlərinə aydınlıq gətirəcək. Son finalçı ilk oyunda sərfəli nəticə əldə edib. “Qəbələ”nin səfərdə vuracağı bir qol “Qarabağ”ı buna 3 qolla cavab verməyə məcbur edəcək. Düzdü, çempionatın son turunda “Səbail”ə uduzan “qırmızı-qaralar”ın düşərgəsində ab-hava yaxşı deyil. Bayıl təmsilçisindən 5 xal geri düşən Sənan Qurbanovun komandasının 3-cü yeri tutacağı real görünmür. Ancaq digər tərəfdən, premyer-liqadan Avroliqaya vəsiqə şansı qeyri-müəyyən qalan “Qəbələ” kubokda istəyinə çatmaq əzmindədi. Başqa sözlə, son məğlubiyyət komandanı ikiqat motivasiya etməlidi, çünki əsas ümid məhz kuboka qalıb. “Qarabağ” səddi keçilsə, “qırmızı-qaralar” tarixində ilk dəfə titul da qazana bilər. Hər halda, finalda favorit məhz qəbələlilər olacaq.
Hər iki komandanın meydana itkilərlə çıxacağını qeyd edək. “Qarabağ”dan Maksim Medvedev cavab görüşünü buraxır. “Qəbələ”nin itkisi daha ciddidi. Belə ki, Stiven Jozef-Monroz cəza səbəbindən “Tofiq Bəhramovda” baş tutacaq matçda iştirak etməyəcək.
“Zirə” – “Sumqayıt” görüşünün favoriti də bəlli deyil. Baxmayaraq ki, “Zirə” doğma azarkeşləri qarşısında oynayacaq, nəticə rahatlaşmağa imkan vermir. Əksinə, səfərdən qolsuz heç-heçə ilə dönən komandalar, adətən, evdə daha həyəcanlı olur. Çünki “Sumqayıt”ın vuracağı bir qol qonaqların üstünlüyünü ikiqat artıracaq. Final hər iki komanda üçün bir ilk olacaq ki, həm “Zirə”, həm də “Sumqayıt” tarix yazmaq istəyir. Qəsəbə təmsilçisi son turda “Qarabağ”dan ağır zərbə alıb, darmadağına məruz qalıb. Ancaq Samir Abasov son turlarda nəticəyə oynamır, bir qayda olaraq, əsas heyət üzvlərinə istirahət verir. Başqa sözlə, bütün gücünü sabahkı görüşə səfərbər edib. “Sumqayıt” da son turda “Neftçi” ilə matça ehtiyat qüvvə ilə çıxmağına rəğmən, sürprizə imza atmağı bacardı. Üstəlik, Əmir Ağayev, Ülvi İsgəndərov, Murad Xaçayev kubokda da komandaya yararlı ola biləcəklərinə dair baş məşqçiyə mesaj göndərdilər. Əslində “Sumqayıt”ın heyətlə bağlı sıxıntısı yoxdu. “Zirə”də isə əksinə, Sadio Tounkara cəza səbəbindən sabahkı matçda iştirak etməyəcək.
Qeyd edək ki, hər iki oyun "CBC Sport" telekanalı vasitəsi ilə canlı yayınlanacaq.
Ölkə kuboku
yarımfinal, cavab oyunları
1 may
Qarabağ – Qəbələ
Hakimlər: İNQİLAB MƏMMƏDOV, Rahil Ramazanov, Pərvin Talıbov, Rəşad Əhmədov.
Hakim-inspektor: Babək Quliyev.
AFFA nümayəndəsi: Ələddin Ələkbərov.
Cəzalılar: Maksim Medvedev (Qarabağ), Stiven Jozef-Monroz (Qəbələ).
Bakı. Tofiq Bəhramov adına Respublika stadionu. Saat 17.00
(ilk oyun – 0:1)
Zirə – Sumqayıt
Hakimlər: ƏLİYAR AĞAYEV, Zeynal Zeynalov, Akif Əmirəli, Rauf Allahverdiyev.
Hakim-inspektor: Munis Abdullayev.
AFFA nümayəndəsi: Ramiz Mustafayev.
Cəzalı: Sadio Tounkara (Zirə).
Zirə. İdman Kompleksinin stadionu. Saat 20.00
(ilk oyun – 0:0)
MİRAĞA