Yığma iyunun əvvəlində yoldaşlıq oyunu keçirəcək
Ötən sayımızda yığmanın baş məşqçisi Nikola Yurçeviçin hazırda Xorvatiyada olduğunu xəbər vermişdik. Təbii, çempionatın qızğın çağında çalışdırıcının oyunlara baxmaq əvəzinə vətənində istirahət etməsi heç bir məntiqə sığmır. AFFA-nın Mətbuat və İctimaiyyətlə Əlaqələr Departamentinin rəhbəri Firuz Abdulla onun Bakıya aprelin 20-də dönəcəyini demişdi. Premyer-liqanın 23-cü turunun oyunlarında da mütəxəssis gözümüzə dəyməmişdi. Burdan belə nəticəyə gəlmək olardı ki, Yurçeviç üç turun oyunlarını izləməyəcək. Daha sonra Firuz bəy bizimlə əlaqə saxlayıb, xorvatın ötən turun 2 oyununu canlı izlədiyini, yalnız bundan sonra vətəninə üz tutduğunu bildirdi. Həmçinin qurum rəsmisi baş məşqçinin aprelin 20-ni gözləmədən Bakıya dönəcəyini söylədi. Görünür, xorvat premyer-liqanın təqviminə yaxşı nəzər salmayıbmış və aprelin 20-si şənbəyə təsadüf etdiyindən 25-ci turun məhz həmin gün start götürəcəyini düşünüb. Ancaq məlum olduğu kimi, 25-ci turun oyunları ayın 18-i və 19-da gerçəkləşəcək.
Yeri gəlmişkən, Yurçeviç report.az saytına açıqlamasında bütün bunlarla bağlı danışıb: “Azərbaycan premyer-liqasında ötən 2 turun 5 oyununu stadiondan canlı izləmişəm. Söhbət 22-ci turun “Sumqayıt” – “Qarabağ”, “Keşlə” – “Neftçi” və “Zirə” – “Səbail”, eləcə də sonuncu həftənin “Sabah” – “Səbail” və “Neftçi” – “Zirə” matçlarından gedir. Planlı şəkildə oyunları izləyirik. Yığma üzvlərini və başqalarını gözdən keçiririk. Yeni oyunçularla da maraqlanırıq. Həmçinin ölkə xaricində çıxış edənləri diqqət mərkəzində saxlayırıq. Bütün futbolçularla bağlı davamlı şəkildə köməkçilərimlə birgə müzakirələr aparırıq. Ötən turun oyunlarından sonra Zaqrebə qayıtmışam. Bakıya aprelin 20-də dönməyi düşünürdüm. Lakin 25-ci turun qarşılaşmaları aprelin 18-19-da keçiriləcəyindən, ayın 17-də gələcəm”.
Bundan başqa, baş məşqçi bildirib ki, yığma üzvləri ilə yanaşı, AÇ-2020-nin seçmə mərhələsi çərçivəsində millinin qarşıdakı rəqiblərini - Slovakiya və Macarıstanı da diqqətdə saxlayır. Yurçeviç yığmanın növbəti təlim-məşq toplanışının yeri və tarixinin iki həftədən sonra dəqiqləşəcəyini deyib. Onun fikrincə, millinin iyunun əvvəlinə planlaşdırılan yoldaşlıq görüşündəki rəqibinin adı elə həmin vaxt bəlli olacaq. Qeyd edək ki, milli Macarıstanı iyunun 8-də, Slovakiyanı isə bundan 3 gün sonra qəbul edəcək. Hər iki görüş "Bakcell Arena"da reallaşacaq.
FARİZ
