Aprelin 3-də AFFA İntizam Komitəsinin növbəti iclası keçirilib. Toplantı premyer-liqada 22-ci, birinci divizionda isə 20-ci turda yaşanan qayda pozuntularının müzakirəsinə həsr olunub.
Premyer-liqa oyunlarından 3400 manar cərimə toplanıb. “Zirə” – “Səbail” matçında hər iki komanda ziyana düşüb. Qonaqlar vərəqə sayının çoxluğuna görə 800 manat cərimələnib. Meydan sahiblərini isə “həkimlər tərlədib”. Belə ki, təcili tibbi yardım xidmətinin nümayəndəsi oyunöncəsi iclasda iştirak etməyib. Buna görə “Zİrə”yə 800 manat cərimə kəsilib. “Qəbələ” – “Sabah” matçında əlavə olunmuş dəqiqələrdə ikinci xəbərdarlıqdan sonra meydandan kənarlaşdırılan “Sabah”ın müdafiəçisi Kərim Diniyev “Səbail”lə bazar günü keçiriləcək görüşü buraxacaq. Onun “qırmızı”sı klubuna 200 manata başa gəlib. Turun bağlanış matçında - “Sumqayıt” – “Qarabağ” qarşılaşmasında, konkret 84-cü dəqiqədə darmadağını həzm edə bilməyən yerli azarkeşlər tərəfindən meydana yad əşyalar atılıb. “Gənclik şəhəri” təmsilçisinə “52-ci maddə” tətbiq olunub: 1600 manat cərimə.
Diviziona gəlincə, “Zirə-2” – “Sabah-2” matçının 37-ci dəqiqəsində qırmızı vərəqə alan əsas komandanın üzvü Pərdis Fərcad-Azad 1 oyun cəzalanıb, klubu 20 manat cərimələnib.
“Zaqatala” üzərində əzmkar qələbə “Sumqayıt-2”yə 100 manata başa gəlib. Bunun 20 manatı oyunun 39-cu dəqiqəsində isə ikinci “sarı”dan sonra meydandan qovulan Baxşəli Baxşəliyevin “qırmızı”sına görədi. Məhz onun kənarlaşdırılmasından sonra oyunda dönüş edən sumqayıtlılar bu gün “Qaradağ Lökbatan”la görüşdə də Baxşəlinin xidmətindən yararlana bilməyəcək. Sarı vərəqələrin çoxluğu isə komandanı 80 manat geri salıb. “Sumqayıt-2” ilə yanaşı, “Qaradağ Lökbatan” və “Neftçi-2” də son turda “vərəqə planı”na görə eyni aqibəti yaşayıb, başqa sözlə, hərəyə 80 manat “tərləyiblər”.
Beləliklə, komitə klublara 3660 manat cərimə kəsib. Nəticədə mövsümün əvvəlindən cərimə sanksiyaları üzrə nəzərdə tutulan məbləğ 118880 manata çatıb.