“Neftçi”nin sadiq azarkeşlərindən biri 1989-90-cı illərdə yazdığı gündəlikləri redaksiyamıza təqdim edib. Həmin dövrün təkcə futbol olaylarını yox, həm də ictimai-siyasi mənzərəsini aydınlatmaq baxımından maraq doğuran gündəlikdən parçaları dəyərli oxucularımıza təqdim etməyi lazım bildik. Demək olar ki, yazılanların nöqtə-vergülünə toxunmadan.
...Top mərkəzdən Elçinə ötürülür. Elçin qapıçı ilə təkbətək çıxır və astaca topu sağ küncə vurur. Qələbə - 4:2 bizim xeyrimizə. Ümumiyyətlə, sinfimizin uşaqlarından – İlhamdan da, Faiqdən də, Elçindən də, Hikmətdən də, özümdən də, xüsusən Şaiqdən də çox razı qaldım.
İndi mart ayının 27-si, saat 17.00-dı. Dünən Hüseyn Abbaszadənin “Dünyadan gör necə insanlar gedib” kitabını oxumağa başladım. Bu gecə televizorda Beynəlxalq Teatr Gününə həsr olunan veriliş var. Birinci dəstədə SSRİ çempionatının başlamasına 10 gün qalır. Bu gün güclülər dəstəsində üç oyun olacaq. Mərkəzi oyun isə “Dnepr”lə Kiyev “Dinamo”su arasında keçiriləcək. Sabah bəlkə Kolatana getdik (oynamağa). Görək də...
Bu gün ayın 29-du. Qar yağır. İşıq yanmır. Axşam televizorda “Kino. Aktyor. Rol” var. “Dnepr”lə “Dinamo” arasında olan oyun 1:0 hesabı ilə kiyevlilərin xeyrinə qurtardı. Dünən Kolatana getmişdik. Oyunun əsas vaxtı 4:4 hesabı ilə başa çatdı. 11 metrlik zərbələr seriyasında isə kolatanlılar qələbə qazandılar – 2:1. Ümumi hesab 6:5 kolatanlıların xeyrinə.
Bu gün martın 30-u, saat 19.25 dəqiqədi. Axşam televizorda “Teatr təbəssümləri” verilişi olacaq. Bu gün SSRİ çempionatında oyunlar olacaq. Birinci dəstədə SSRİ çempionatının başlanmasına bir həftə, yəni 7 gün qalır.
Bu gün martın 31-i, saat 19.50-di. Bu gün televizorda “Dalğa” var. Sabah ayın 1-i, yəni 4-cü rübün ilk günüdü. Bu gün oxuduğum məlumata görə, dünya çempionatı 1990-cı il uyunu 9-dan iyulun 8-nə qədər İtaliyanın 12 şəhərində keçiriləcək.
Bazar günü, 2 aprel, saat 11.50. Birinci dəstədə SSRİ çempionatının başlamasına cəmi 4 gün qalır.
3 aprel, saat 12.00. Dərsimiz boş keçir, Ə. müəllim jurnal oxuyur. Bu gün televizorda “Neftçi”nin mövsümə hazırlığına dair veriliş olacaq.
5 aprel, saat 12.30. Fizika dərsi gedir. Sabah “Neftçi” oynayacaq. Oyun saat 18.55-də başlayacaq. “Dialoq”da “Neftçi”nin rəhbərləri və oyunçuları vəd etdilər ki, güclülər dəstəsinə gələcəklər. Görək də. Bu gecə televizorda “Sükutun harayı” bədii filmi var.
Aprelin 6-sı, saat 9.55. Bu gün “Neftçi” birinci oyununu keçirəcək. Saat 18.55-də. Deməli, starta cəmi 9 saat qalır. Coğrafiya dərsi gedir. Bu gecə televizorda Azərbaycan dilində kino var: “Baş tutmayan ayrılıq”.
6 aprel, 21.00. Gündəlik, bu gün ikinci dəfə görüşürük. Buna səbəb isə “Neftçi”nin oyunudu. “Neftçi”nin oyunçuları hamısı ... (söyüş yazıb – red.). Samir Ələkbərov istisna olmaqla. Vicdansızlar! “Neftçi” – “Kuzbass” 0:0 oldu.
7 aprel, saat 22.30. “Zaman” gedir. Bu gün “Dalğa” da var. Sabah yox, birisigün “Neftçi” oynayır. MOİK-lə. Bu gün dərs danışmadım. Sabir Rüstəmxanlının “Ömür kitabı”nı oxumağa başlamışam.
8 aprel, saat 15.00. Bu gün televizorda “Retro” var. Sabah istirahət günüdü. İndi “Sovetski sport”un son nömrələrini oxuyuram.
9 aprel, saat 11.15. Bir azdan kəndin o biri başına gedəcəyəm. Futbol saat 17.00-da başlayacaq. Bu gün televizorda “Zaman”dan sonra Lütfəli Abdullayevə həsr olunan veriliş və həndbol var. “Bakılı” “Rostselmaş”la oynayacaq. Futboldan sonra bir də görüşəcəyik.
(davamı olacaq)