Orxan Allahverdiyev: “Ayda komandaya 10 min manat xərcləyirdik”
Bu gün futzal üzrə yüksək liqada növbəti turun oyunları keçiriləcək. Bakı İdman Sarayında keçiriləcək 23-cü turun oyun cədvəlini və təyinatları qəzetimizin ötən saylarından birində nəzərinizə çatdırmışıq. Sadəcə, bir qaranlıq məqam var. Məlum olduğu kimi, “Yasamal” MFK mübarizəni dayandırıb. Reqlamentə görə, çempionat ərzində üzürlü səbəb olmadan 3 oyuna gəlməyən komanda avtomatik yarışdan kənarlaşdırılır. Ötən turda “Araz”la oyuna gəlməməklə “Yasamal” MFK 3-ü haqladı. Komanda üçüncü dövrənin ilk iki turunda “Araz” və “Ekol”la görüşlərdə də iştirak etməmişdi. Baxmayaraq ki, sonradan özlərində güc tapıb 4 oyuna çıxmışdılar. “Yasamal” MFK-nın məsələsinə bir daha qayıtmağımız səbəbsiz deyil. Məsələ burasındadı ki, federasiyanın rəsmi saytı turun təqviminə “Yasamal” MFK – “Ekol” matçını da daxil edib. Hətta oyun saatı və təyinatlar da açıqlanıb. Saat 12.30-a təyin olunan oyunu Mehman Mahmudov, Elmir Quluzadə və Elvin Ağayevdən ibarət briqada idarə etməlidi. Bəlkə “Yasamal” MFK-ya güzəşt olunub? Futzal Federasiyasının mətbuat xidmətinin rəhbəri Mahal Məmmədovu dinləyək: “Böyük ehtimalla “Yasamal” MFK-nın məsələsi məlumdu. Yəqin yenə oyuna gəlməyəcəklər. Həmin oyunu qrafikə salmamaq olardı. Ancaq biz İntizam Komitəsinin rəsmi qərarını gözləməliyik. Fasilə olduğuna görə İK-nın növbəti iclası gələn həftə baş tutacaq. Soruşduq, dedilər ki, qərar yoxdusa, oyun təqvimdən çıxarılmamalıdı. Bəlkə “Yasamal” MFK elə səbəb göstərəcək ki, İK onu üzürlü sayacaq”.
Əslində federasiyanın rəsmi sənədə əsaslanması normaldı. Amma oxucularımız durumdan tam hali olsun deyə, məsələnin sonuna qədər getdik. Belə ki, axtarıb “Yasamal” MFK-nın rəhbəri Orxan Allahverdiyevi tapdıq və “Ekol”la oyuna çıxıb-çıxmayacaqlarını soruşduq: “Artıq fəaliyyətimizi dayandırmışıq. Federasiya da durumdan xəbərdardı. Maddi vəziyyət yaxşı deyil. Davam etmək iqtidarında deyilik. Komanda dağılıb, iranlıları gətirə bilmirik. Əslində 3-4 nəfərin müqaviləsinin müddəti mövsümün sonuna qədərdi. Tələb etsək, gəlib son dövrəni yola verə bilərlər. Amma onları gətirib maddi xərclərini qarşılaya bilmirik. Legioner gətirirsənsə, ona ev tutmalısan, başqa məişət qayğılarını həll etməlisən, maaş verə bilməsən də, mükafat ayırmalısan. Çünki iranlı gəlib burda qidalanmalı, ailəsinə pul göndərməlidi, ya yox? Dekabrın pulunu öz cibimdən verdim, yanvarda imkanım olmadı. Onlar da çıxıb getdilər. Oyun saatı, təyinatların açıqlanması formal xarakter daşıyır, oyuna gəlməyəcəyik və bunu yuxarılar da bilir. Bu illik fəaliyyətimizə son vermişik. Bəlkə yayda vəziyyət dəyişdi, növbəti mövsüm yenidən qayıtdıq”.
Qeyd edək ki, “Yasamal” MFK-nın əvəzediciləri birinci liqada çıxış edir. Bəs onların taleyi necə olacaq? Allahverdiyev ikinci komandanı saxlayacağını deyir: “İkinci komanda ilə bağlı problem yoxdu. Orda heyət genişdi, 20 futzalçı sifariş etmişik. Komanda ortabablardandı. Nəticəsi bizi tam qane etməsə də, yolumuza davam edəcəyik. Əslində reqlament imkan vermir, yoxsa ordan bir neçə nəfəri əsas komandaya götürüb mübarizəni davam etdirərdik. Əsasnaməyə görə, ikinci komandadan 2 nəfəri yüksək liqada oynada bilərik. Əsas komandada isə cəmi 2 yerli futzalçımız var. Birlikdə say 4 edir, yəni bir “beşlik” belə düzəlmir. Səhv özümüzündü, komandanı formalaşdıranda iranlıların sayını azaldıb yerlilərdən bir neçəsini əlavə etməliydik. İndi belə problemlə qarşılaşmazdıq. Bilmirdik ki, vəziyyət belə alınacaq. 10-12 iranlı gətirmişdik, onların 5-6-nı bizim klublar ələ keçirdi, 1-i İranda özünə klub tapdı”.
Fürsətdən yararlanıb Orxan bəydən komandanın yüksək liqadakı xərclərini də öyrəndik: “Klubu 2014-cü ildə təsis etmişik. 2016/17 mövsümündə 4-cü, 2017/18-də 6-cı yeri tutduq. Ötən mövsüm sponsorumuz var idi. Ayda komandaya 10 min manat xərcləyirdik. Bu il isə bu məbləğ bir neçə dəfə az oldu. Konkret bu mövsüm futbolçulara ödənilən məbləğ və başqa xərclər 2200-2500 aralığında dəyişirdi. Tutaq ki, 2-ci və ya 3-cü yeri tutdum, yenə büdcəmə təsir etməyəcək. Legionerlərin transferindən də heç nə əldə etmədim. Mənə qalan əziyyət oldu. Sonluq da belə alındı, mübarizəni davam edə bilmədik, adımıza xələl gəldi. Federasiyaya kömək üçün müraciət etmədim. Kiməsə yük olmağı xoşlamıram. Belə baxanda mövsümün əvvəlində bizə eşitdirmişdilər ki, federasiyadan nəsə gözləməyin”.
MİRAĞA
